Footer

Iti Kuadrado a Lubong ni Emmanuel

Sarita ni Salvador A. Espejo

Maikadua a Gunggona, Salip iti Sarita ti Economy Tours & Tavel, Inc.

 

 

Tinangad ni Emmanuel ti Empire Building. Iti tangkarang ti nakuyem a tangatang, nakatangtangsit ti takder ti sangapulo-kadsaaran a pasdek iti nagbaetan ti Pines City Bank ken Gotao Commercial Complex.

Iti apagdarikmat, nagpukaw ti babantot ni Emmanuel. Limmawag ti rupana ket manen, dina naigawid ti yaapon ti panagraem iti barukongna. Iti imatangna, kasla dayag ti Empire Building, makakayaw, makaarit.

Ngem naglumen ti raniag ti mata ni Emmanuel idi sumiplot iti panunotna a dinanton masirayan iti binigat ti daeg daytoy a pasdek. Gapu (kano) iti agdama a krisis iti ekonomia, agkissay ti Empire Services iti mangmangged. Saanton a kasapulan ti serbisio da Emmanuel ta agbalinton a self-service dagiti uppat nga elebeytor. Ita ti maudi nga aldawda nga elevator boys iti Empire Services.

Nakitem ni Emmanuel ti bibigna. Apay a no sumangbay dagiti parikut agtataruptop? Ita pay met ta uppaten a ngiwat ti ilanglangoyna iti biag ti pannakaikkatna. Numona ta nakaudna ti sangkabassit nga urnongna iti panagpasngay ni baketna itay kanikatlo nga aldaw. Suni ngamin ti ubing ket gapu ta di kabaelan ti inayabanna a mammaltot, kapilitan nga intarayna iti ospital. Nangina ti siningir ti ospital.

Immanges ni Emmanuel iti nauneg. Tinangadna pay naminsan ti pasdek sa simmurot iti agus a bimmallasiw iti kalsada. Tumuyutoy dagiti tao iti bangketa.

Induronna ti desarming a ridaw. Sinabat ti lamiis idi makadap-aw iti uneg. Immasideg iti counter a pagbanbantayan ni Andro, ti guardia, ket nagpirma iti logbook. Nagpelles iti basement sa simrek iti puestona.

Nagtugaw iti nangato ti sakana a bangkito sana impalawlaw ti panagkitana. Nagsaltek dagiti matana kadagiti nataratar a numero iti ngatuen ti ridaw. Immanges iti nauneg. Iti uneg ti walo a tawen, daytoy ti kuadrado a lubongna manipud iti alas otso agingga iti alas sais iti Lunes agingga iti Sabado. Ditoy kuadrado a lubong, nadumaduma a parsua ti nakalkalangenna, agduduma a padas ti napasaranna. Ditoy ti pakayallatiwan dagiti kabaruanan a damag, pakaikalbitan dagiti aramid a maikurkurimed ken pakayarasaasan kadagiti palimed.

Nasinga ti nauneg a panagpampanunot ni Emmanuel idi tallo a babbai ti agsasaruno a simrek iti elebeytor. Ti kaudian a simrek, ni Tessie Magno, ti am-ammona. Agpapaay ni Tessie iti Bonanza Enterprises.

“Sixth floor,” kinuna ti narapis.

“Iti met fourth floor kaniak, Manong,” inyisem ni Tessie.

Nasiputan ni Emmanuel ti panaglibbi ti narapis sana pinarukiban nga agpababa-agpangato ni Tessie Magno.

Nagtengda ti maikapat a kadsaaran. Iniseman ni Tessie Magno ni Emmanuel sa rimmuar.

“Oy, kabarbaro manen ti kawes ni Miss Magno, sika,” inkalbit ti narapis iti kaduana.

“’Nia koma ti nakadidillaw iti dayta?” kinuna ti nalukmeg. “Dakkel ti sueldona a kas sekretaria, saan kadi?”

“Ti dakesna kenka ta dika makaangot iti ginelgel a baraniw,” inlibbi ti nakuttong. “Dimo kadi ammo a…” adda inyarasaasna.

“Kasta?” nagmulagat ti nalukmeg. “Nakaem-emma ti langana, naaramidna dayta?”

“No kitkitaem, kasla di makapettak iti bulong. Ngem kuidaw, adda milagrona, sika.”

“Ngem pordios, ania ti nakitana ken ni kalbo ta tinutopanna? Malaksid ta naasawaan, addan sa aminen a bisio kenkuana.”

“Daytoy ti gapuna,” pinagtimbukel ti nakuttong ti tammudo ken tanganna. “Ay, no di agkibaltang, addanto manen sabali a Malou de la Cruz a pagtutungtongan ditoy Empire.”

“Sixth floor,” indagsen ni Emmanuel ti timekna. Tinalmeganna ti buton a mamaglukat ti ridaw.

“Ay, nakadanonta gayamen,” inrungiit ti narapis.

Dagiti labid, ingngayemngem ni Emmanuel. Ni la ketdi Mr. Andres Alegre, ti executive vice president ti Bonanza Enterprises, ti lawlawitenda.

Pudno ngata ti ipadpadamag ni kuttong? naisipna. Kasla dina patien a tutopan ni Miss Magno ni Mr. Alegre. Mayo ken Disiembre ti baetda. Ngem saan kadi a mannakabalin ti pirak ket kabaelanna a lunagen uray katangkenan a puso?

 

Comments are closed.
%d bloggers like this: