Footer

Nakabasol gapu Iti “abut” a sinerrekna

Komentario ni Melvin Bandonil

 

Itay laeng nabiit, naipadamag ti panangtiliw dagiti polis ti General Santos City ti maysa a maestra kabayatan ti napasnek a panangisurona kadagiti adalanna iti elementaria. Estafa ti kasona. Awan ti naaramidan ti titser no di situtulok a simmurot kadagiti polis agsipud ta adda iggem dagitoy a warrant of arrest. Saan a nagustuan ti titser ti napasamak, ngem awan ti maaramidanna no di agtungpal iti linteg. Kasta met a saan a nalawag iti biang ti titser ti pasamak ta awan ti ammona nga inaramidna a pakadaksan ti sabali. Ngem ti linteg ket linteg a nasken a maipatungpal ken masurot.

Timmulong laeng ti titser iti pakarikutan ti gayyemna. Sipupuso nga itutulong. Naimbag nga aramid ti tumulong iti agkasapulan, saan kadi? Ngem daytoy nga itutulongna ti rason a nakatiliwanna kadagiti polis. Daytoy nga itutulongna iti pakarikutan ti gayyemna ti dakkel a nakaibabainanna. Agasem met daytan, madama pay a mangisursuro ti titser idi napan tiniliw dagiti pulis? Maysa nga eksena a makapasennaay a nagameran iti nagduduma a kurokuro ken kapanunotan.

Ania ti nagbasolanna? Simrek iti “abut” tapno timmulong iti agkasapulan. Babaen ti nalaus a panagayatna iti gayyemna, situtudio ken nangitalek ti bagina a kas co-maker ti gayyemna nga immutang. Gapu iti gagem ti titser a masolusionan ti gayyemna ti dakkel unay a pakarikutan daytoy a pinansial. Ti rigatna, saan a nakabayad ti gayyemna.

Iti linteg, dakkel a responsibilidad ti panagbalin a co-maker. Kayatna a sawen a sika ti mangited iti dakkel a garantia a mabayadan ti utang. Kaipapananna metten dayta a sungbatam ti pinirmaam a kasuratan inkaso a saan a makabayad wenno saan nga ikaskaso ti immutang a bayadan ti inutangna.

Ania ti co-maker? An individual other than the borrower who signs a promissory note and thereby assumes equal liability for it. Also called co-signer.

Person who, with other individual(s), guarantees a financial commitment (such as repayment of a loan). He or she is jointly and severally liable, with the other signatories (co-makers), for honoring the commitment in full. Also called co-guarantor.

Kas co-maker, co-signer wenno co-guarantor, agpadpadakayo (sika ken ti immutang) iti legal a responsibilidad. No saan a makabayad ti immutang wenno dinan kayat a bayadan ti utangna, sika a co-maker ti kapilitan nga agbayad kadayta nga utang. Kayatmo man wenno saan, dayta ti mapasamak ken di maliklikan ta pinasingkedam ti responsibilidadmo iti panagpirmam iti katulagan.

Mabasa daytoy a linteg iti Article 2047 ti New Civil Code of the Philippines: By guarantee a person, called the guarantor, binds himself to the creditor to fulfill the obligation of the principal debtor in case the latter should fail to do so.

Kaipapananna dayta ti iseserrekmo iti maysa nga abut, ta idin nagreggaay, sikan ti nagaburan.

Isu a nasken ti panangusig a nalaing iti serserken a katulagan ta amangan no dayta ti mangipaay iti dakkel a pakadadaelan ti nadalus a naganmo.

Kas ti napasamak ken ni titser. Piman a titser. Ngem maysa a leksion iti biag ti napasamak kenkuana. Saan laeng nga isuna no di pay ket ti amin.

Pudno la unay tay kunada a pagsasao: dimo ibaet dayta bagim a kas iti paet, ta dikanto ket malangdet!#

Comments are closed.
%d bloggers like this: