Footer

No apay nga ipatpategko ti panagisurok. (Maudi iti dua a paset)

Ni Jobert M. Pacnis

Bayat ti panagibturko iti sagubanit, adu dagiti gundaway a mapaluaak aglalo no kasta a malagipko dagiti napanawak nga ubbing. Tallo bulan laeng (Hulio-Setiembre) a naisurok ida. Diak simrek iti Hunio ta isu met ti kaaddak iti ospital. Ket no naan-anay koman ti panagimbagko kadayta a Setiembre, nalabit a napanakon iti Manila idi tumawag ti nagaplayak. Diakon nagreport iti Oktubre agpapan kadagitoy ta di met laengen maaw-awan ti madi a marikriknak. Adun ti nagpakpakitaak, doktor man wenno albulario.

Wen, mapaluaak aglalo no mabasak dagiti mensahe dagiti estudiantek iti selponko. Kas man la maysaak nga ama wenno manong kadakuada. Makapatangar iti lapayag!

Uray idi addaak pay laeng iti NCCFI, adu met dagiti padasko nga isu ti nagbalin a rason no apay a nagbayagak ditoy iti baet dagiti nadakamatkon a parikut. Awan pay idi ti pamiliak ket impabus-oykon ti panawenko kadagiti ubbing, awansan ti imbatik para iti bagik, para iti pagsayaatanda.

Saan laeng a problema dagiti ubbingko iti uneg ti pagadalan ti nayebkasda kaniak. Uray pay iti uneg ti pagtaenganda! Adu nga estoria ti diak ninamnama a mangngegan. Nakariknaak iti ragsak kadagita ta ipakitana laeng ti panagtalekda kaniak.

Nadlawko met a naayatan dagiti ubbing ta siak ti maestroda iti Math (ken Physics idi agangay). Saanen a kas idi a kagurgurada daytoy a subject. Estoriaenda kaniak no kasta a break-mi a no Math kanon ti subject-da idi elementariada, mabutengdan. Abusta kano nagrigat, terror pay ti titserda.

Naimbag kano ta naanusak ken nalawag ti panagisurok– saan nga iti panangbagkat iti bukod a bangko.

Ammok daytan a problema ta napadasak met idi nagbasaak. Isu a nabalabalakon ti estratehiak idi agbayagakon nga agisuro.

Kadaytoy a panangkapet kaniak ti sakit, saan laeng nga iti text ti nangidanonan dagiti ubbing ti panangipategda kaniak.

Sinarungkarandak iti ospital ken uray ditoy balay. Uray no ilingedda, masiputak latta ti panagluasitda iti pannakaimatangda iti rigatko.

Saan laeng a dayta. Maysa a nagannak ti mismo a naggasto maipakitanak laeng iti mangngagas a nakaagas kadakuada. Diak ninamnama daytoy. Ngem kinuna ti nagannak a kas panangsubsubadna kano iti kinasayaatko iti anakda aglalo iti panawen a problemado daytoy.

Anian, nakunak. Kastoy gayam ti rikna ti maipatpateg a mannursuro!

Ita, uray manon a tawen nga awanak iti NCCFI, saan latta a nakalipat dagiti dati nga adalak. Makapatpatangko pay laeng ida babaen ti text ken email. Agyamyamanda. Aglalo ita ta nakapasadan iti board ti kurso nga innalada. Ita a sursuratek daytoy, adda manen immay simmarungkar nga estudiantek pay la idi iti NCCFI. Dagiti met di nakapagtuloy, innaladak a ninong dagiti annakda!

Wen, paseten ti biagko ti panagisuro. Ipatpategko la unay. Teaching is the noblest profession, kunada itay iti English.

Awan ti idawdawatko iti Namarsua no di sapay la koma ta makasubliak met laeng nga agisuro iti umay a panagseserrek. Mailiwakon a mangikur-it ti tisa iti agkupkuplaten a blakbordmi. Mailiwak metten a dumngeg kadagiti makatitileng nga ubbing. Ken dumngeg manen kadagiti estoriada.

Adda agdamdamag kaniak no mapanakon iti public ta naipasak metten ti kinamannursuro idi Setiembre 2008. Daytoy ti sungbatko: aglaplapusanandan iti public. Masaksakit dagiti pribado a pagadalan itoy nga ili. Saan man a siak ti naan-anay a makaagas, ngem kayatko ti agbalin a paset iti panagimbag– kas iti panagbalin a paset dagiti mangipatpateg kaniak nga ubbing iti panagimbagko.#

 

Comments are closed.
%d bloggers like this: