“No Lunch Break Policy” nairusat iti Vigan City

VIGAN CITY –  Agtultuloy ti panangipaay dagiti nadumaduma nga opisina ditoy iti serbisio kadagiti umili uray iti tiempo ti pangaldaw, daytoy ti naammuan manipud iti mayor ditoy siudad.

Kinuna ni Mayor Eva Marie S. Medina a nangrugi ti “No Lunch Break Policy” ti city government idi Septiembre 15 tapno agtuloy ti pannakaited ti serbisio kadagiti umili nga adda masapulda kadagiti opisina iti tengnga ti aldaw wenno lunch break dagiti empleado.

Nairusat daytoy gapu iti kapaliiwan nga adu dagiti residente ditoy siudad nga awan ti panawenda iti regular a panagopisina ket sada la maaddaan iti libre nga oras a mapan mangala kadagiti kasapulanda a dokumento iti city hall iti tiempo ti pangaldaw.

Iti regular a panagopisina, sumrek dagiti empleado iti 8:00 a.m. sada aggawid iti 12:00 ken sumrekda manen iti 1:00 p.m. ken aggawid iti 5:00 p.m.

Iti babaen ti “No Lunch Break Policy”, adda latta mabati nga empleado a mangasikaso kadagiti umili nga adda kasapulanda kadagiti maseknan nga opisina.#