1.6 million a turista, nagpasiar iti Ilocos Norte idi 2015

LAOAG CITY – Mapattapatta nga agdagup iti 1.6 million  dagiti turista, lokal man ken ganggannaet, itay napalabas a tawen, daytoy ti report manipud iti Ilocos Norte Tourism Office (INTO).

Immadu iti 22.15% ti bilang dagiti turista a bimmisita iti Ilocos Norte itay 2015 no maikumpara idi 2014 nga agdagup laeng iti 1.2 million dagiti turista a nagpasiar iti daytoy a probinsia, kuna ti INTO.

Kaadduan ti bilang ti tourist arrivals idi summer manipud Abril agingga iti Mayo, inreport pay ti INTO.

Iti State of the Province Address ni Governor Imee R. Marcos, kinunana a simmuyop ti turismo iti probinsia iti 380.64% iti napalabas a dua a tawen no sadino a nasurok a 1.3 million dagiti turista a bimmisita iti Ilocos Norte manipud Enero agingga iti Hulio 2015 laeng.

Kasta met nga idi naangay ti Asia Pacific Economic Cooperation (APEC) Leaders’ Meeting iti Metro Manila idi napan a bulan, dakkel a bilang dagiti turista ti bimmisita iti probinsia a nakaigapuan iti di ninamnama a panagkurang ti akomodasion ken suplay ti taraon kas iti bagnet kadagiti nangruna a lugar ti turismo.

Idi inyussuat ti gobierno probinsial ti ‘Paoay Kumakaway’ idi 2012, nakapataud daytoy a kampaniana iti ad-adu a panggedan dagiti lokal nga agindeg, nangruna iti sektor ti serbisio ta saan laeng a nasional no di pay global nga atension ti naawisna.

Idi met napan a bulan, linuktan ti probinsia ti Burgos Lighthouse Museum, ti Balay Dingras ken ti Taoid Museum a nangitanggaya iti ad-adu pay nga atraksion ken lugar a pagpasiaran kadagiti turista a nasurok 60% kadagitoy ti nagsubli a nagbisita iti probinsia.

Kinuna ni Governor Marcos a “makaparagsak a problema” ti panagsubli dagiti bisita agsipud ta kaipapananna nga epektibo ti inwayatda nga estratehia.

Simmurot iti idadakkel ti bilang dagiti agsangpet a turista iti probinsia ti idudur-as ti ad-adu pay nga inprastruktura ti turismo ken pasilidad a pinatalgedan ti idadakkel ti kapasidad a laonen dagiti otel ken pagdagusan manipud iti 1,700 idi 2012 agingga iti agarup 3,000 itay napalabas a tawen.

Gapu iti panagdadarison dagiti turista, napasayaat dagiti kangrunaan a kalsada iti Burgos, Pagudpud agingga iti Mt. Sicapao iti Nueva Era.

Simmayaat pay ti transportasion para iti publiko iti pannakaiyussuat ti Metro Ilocos Norte Council-Night Express idi Marso 2015 tapno masungbatan ti kalikagum dagiti turista a makapagdaliasat iti rabii nangruna iti rota nga agturong iti Pagudpud.

Malaksid dayta, nasurok a 60,000 ti naawis a nagbuya kadagiti dadakkel a pagteng ken pabuya iti Ilocos Norte kas iti Himala sa Buhangin! Arts and Music Festival, Semana ti Ar-aria, Paskua Mi Ditoy ken Tan-ok ni Ilocano Festival of Festivals.

Kinuna ni Governor Marcos nga immadu pay dagiti turista ta saan laengen a pampamilia no di pay korporasion, sosial ti sumangsangpet kas iti APEC-Renewable Energy Group idi Abril ken ti Philippine Chamber of Commerce and Industry idi Hulio.

Ti pay Ilocos Norte ti nagsangaili iti maikatlo a Paoay Lake International Regatta idi Oktubre nga inatenderan dagiti gumagaud ditoy pagilian ken internasional a partisipante manipud iti Asia, Australia ken United Kingdom.

Kinuna ti gobernador a kaadduan kadagiti agpaspasiar iti Ilocos ti um-umay iti probinsia gapu iti sabsabali a kultura dagiti tattao, dagiti tribu, dagiti barangay iti Ilocos Norte.

Impalgak ti gobernadora nga ad-adu pay a lugar iti probinsia ti mapadur-as nangruna ti di pay nadiskubre nga Ilocano Cordillera iti munisipalidad ti Sarrat, Piddig, Carasi, Solsona, Dingras, Marcos, Banna ken Nueva Era.

“Adu pay dagiti maadal, makita ken mapadas ditoy Ilocos Norte,” kinuna ni Governor Marcos. (Manipud iti report ni John Michael Mugas, PGIN-CMO)