Footer

1-M marunggay, puntiria a maimula iti Tagudin

TAGUDIN, Ilocos Sur –  Nagmula iti patubo a marunggay dagiti opisial daytoy nga ili ken nadumaduma nga ahensia ken sektor sadiay Mt. Tabur, Barangay Bio ditoy nga ili kas paset ti pannakarambak ti panagkasangay ni Mayor Roque Verzosa.

Nakipartisipar iti daytoy a gannuat dagiti opisial ti ili, dagiti empleado ti gobierno ken pribado, nadumaduma a pagadalan elementaria, sekundaria ken kolehio, barangay officials, tanod, BHW, BNS ken RIC.

Kinuna ni Verzosa a puntiria ti gobierno munisipal ti makaimula iti 1 milion a marunggay agingga iti maungpotna ti takemna kas mayor. Segun iti mayor, addan 800,000 a naimulada a marunggay.

Impalgak pay ti mayor nga adda negosiante nga enteresado a mangipasdek iti pasilidad a mangproseso iti marunggay iti ilida.

Naigiddan iti daytoy nga aldaw ti ceremonial lighting dagiti streetlights iti national highway, pannakaiwaras dagiti bag, pannakabendision ti Ambalayat Integrated School ken panangrambak iti anibersario ti tiendaan publiko ditoy. (Danny Antalan)