1 napaltogan, 3 nabagsol iti riribuk

CANDON CITY – Maysa ti napaltogan idinto a tallo ti nabagsol iti labo-labo a napasamak iti asideg ti maysa a paginuman sadiay Barangay Paras, Candon City idi parbangon ti Nobiembre 20.

Agpada a naitaray iti Resonable Hospital da Reynaldo Balbin Ganacias, Jr., 25, baro, ken residente iti 21 Gumamela, Quinfermin, Santa Cruz, Ilocos Sur gapu iti bagsol iti makannigid a takiagna ken pannakapaltog ti bukotna; ken ni Raymark Pimienta Molina, 17, baro, ken residente iti San Isidro, Candon City; idinto a naitaray met iti Candon City Hospital ni Emmanuel Balot Dela Cruz, 27, baro, ken residente iti Barangay San Isidro, Candon City a nagsagrap iti bagsol iti tianna; ken ni Markei Mario Salazar, 18, baro, ken residente iti Barangay Paras, Candon City.

Nabigbig met ti pimmaltog ken ni Balbin a ni Arnel Perez Salazar, 48, naasawaan, manager iti Shai Rai Disco Bar ken residente iti Barangay Paras, Candon City.

Segun iti guardia ti nasao a disco bar a nabigbig a ni Monte Fabros Velasco, 22, naasawaan, ken residente iti Barangay Caterman, Candon, City, nakitana a nagriri da Salazar ken ti di nainaganan a gayyemna a babai nga Irish ket tinungpa ti lalaki ti babai.

Mapapati a pinadas dagiti dua a lallaki ti naganawa ngem nagresulta ketdi iti komosion.

Mapapati nga innala ni Perez ti service firearm ti security guard sa naglugan iti tricycle; kalpasan ti sumagmamano a kanito ket adda nagkanalbuong.

Kalpasanna, insubli met laeng ni Perez ti paltog iti guardia.

Sinapul dagiti nagresponde a polis ni Perez ngem saanda a nabirokan.

Insuko met ti security guard ti cal. 38 a paltogna, agraman ti maysa a bala, maysa a dud bullet ken maysa a kapsula.

Saan a nasarakan ti armas a naaaramat iti pammagsol.
Inaresto dagiti polis ni Salazar sada impan iti police station para iti umisu a disposision.#