1 natay, 1 nasugatan iti nagsaruno a pammaltog

CABUGAO, Ilocos Sur – Maysa a mannalon ken maysa nga agpaspasada iti traysikel ti napaltogan a nakatayan ti immuna iti maudi nga aldaw ti Pebrero.

Sinaed a pinaltogan ti di pay nabigbig a tao ni Edwin Celos Serna, 37, baro, mannalon ken residente iti Barangay Cael-layan, ditoy nga ili, bayat ti panaggawidna idi agarup alas 11:30 ti rabii ti Pebrero 28.

Nagresponde a dagus dagiti polis ditoy kalpasan a nakaawatda iti tawag iti selpon manipud ken ni Barangay Captain Margarita Zabala nga adda napaltogan iti barangayda.

Iti inisial nga inbestigasion dagiti polis, kagapgapu ni Serna iti minatayan ket addan iti dalanna nga aggawid idi napaltogan a nagsagrapanna kadagiti sugat iti nadumaduma a paset ti bagina a puon ti dagus a nakatayanna.

Nakarekobre dagiti inbestigador iti uppat a kapsula a mapapati a nagtaud iti cal 5.56 mm armalite iti nakapasamakan ti krimen.

Saan pay nga ammo ti motibo ti pammapatay.

Kabayatanna, sabali pay a pammaltog ti napasamak iti national highway a sakup ti Barangay Sagpat, Bantay, Ilocos Sur idi agarup alas 3:20 ti parbangon ti Pebrero 28 a nakagandatan ti biag ni Rogelio Rabang y Ujano, 49, naasawaan, tricycle driver, ken residente iti Barangay Cabuloan, Sta. Catalina, Ilocos Sur.

Naammuan iti panagimbestiga dagiti polis Bantay nga indagas ni Rabang ti asawana nga aglako iti nateng iti tiendaan publiko ti Sto. Domingo, Ilocos Sur ket agdaldaliasat iti abagatan a direksion ngem idi  addan iti Barangay Sagpat, Bantay, pinaltogan ti di pay nabigbig a suspek a mapapati a simmurot kenkuana a nakalugan iti motor.

Uray natamaan, nabaelan ti biktima nga intaray ti bagina iti Metro Vigan Cooperative Hospital para iti madagdagus a pannakataming dagiti sugatna.

Mapapati a cal .45 ti naaramat iti pammaltog kas maibatay iti maysa a kapsula ken napitpit a buli iti nakapasamakan ti krimen.

Nangiwayat dagiti polis Bantay iti dragnet operation ken pinakdaaranda dagiti police stations kadagiti kabangibang nga ili mainaig iti pammaltog ngem negatibo ti nagbalin a resultana.

Iti pannakaisurat daytoy, di pay ammo ti motibo ti pannakagandat ti biag ni Rabang.#