Footer

1 natay, 24 pasahero nasugatan iti aksidente

CANDON CITY – Maysa a baket ti natay idinto a 24 a pasahero ti nadundunor idi nabaliktad ti bus a naglugananda iti sungaban ti maysa a rangtay iti Barangay Langlangca 1st ditoy nga ili iti parbangon ti Mayo 10.

Iti report a naggapu iti polis ditoy, natay ni Josefina Pacanuayan y Agcaoile, 87, balo ken natibo ti Barangay Centro 7, Claveria, Cagayan idinto a naitaray dagiti padana a pasahero agraman ti drayber ti bus iti Candon General Hospital tapno mataming dagiti dunorda.

Nainaganan dagiti nasugatan a pasahero a da Roel Dominguez y Daniel; Ralf Dominguez y Daniel; Ryan Revita y Rebellion, 26; Pablo Abaoag Jr., 24; Jaime Priala, 45; Jose Tabloro, 46; Journey Callejo, 36; Jonathan Abran, 37; Robert Salvador, 26; Remedios Pacanuayan, 59; Mart Villana, 16; Joseph Abaoag, 12; Charity Liamero, 34; Jennifer Briones, 23, Martinez Pascua, 37; Grace Briones; Karen Callagae, 21; Grace Ramos, 29; Elizabeth Dumlao, 25; Maybelyn Pedro, 28; Inocencio Queja; Obito Queja; Jasper Arcayna, 21; ken Minda Aguinaldo.

Segun iti inisial nga inbestigasion dagiti polis ditoy, ti kinagalis ti kalsada maigapu iti panagtudona ti nakagapu iti pannakabalintuag ti lugan.

Mapapati a napukaw ni Rogelio Vicente, 56, drayber ti RCJ Bus, ken residente iti Bugasin, Banna, Ilocos Norte ti kontrolna iti manibela bayat ti panagkurba ti lugan ket dinungparna ti kongkreto a railings ti Lucong bridge a sakup ti Barangay Langlangca 1st, sa ti iron railings a nakaigapuan ti panagbaliktad ti lugan iti makannigid a pasetna.

Pinaglibakan ni Vicente a nakatuglep ket inkalinteganna a maysa a kilometro pay laeng ti nataray ti lugan kalpasan a rinelibuanna ti kaduana a drayber.

Nakaro ti dadael ti sungo ti lugan ken naikustodia ti drayber iti police station ti Candon City.#