1 natay, 3 nadunor, 1 mapukpukaw gapu iti Bagyo Quiel: report ti OCDRC1

SAN FERNANDO CITY – Maysa ti natay, tallo ti nasugatan idinto a maysa ti mapukpukaw iti iduduprak ni Bagyo Quiel iti Amianan a Luzon a pakairamanan ti Region I, daytoy ti kaudian a report a naggapu iti Opisina ti Civil Defense Regional Council I.

Agdagup iti 167 a balbalay ti nadadael iti La Union ken Pangasinan agsipud iti panaglayus nga insangbay ni Bagyo Quiel. Lima kadagitoy ti total a naduprak idinto a 162 ti partial a nadadael.

Nalmes ni Joel Paranada, 28, residente iti Barangay Naguiddayan, Bantay, Ilocos Sur idi naiyanud iti waig ket nasarakan ti bangkayna iti Barangay 22, Bacarra, Ilocos Norte iti agarup alas 11:00 ti bigat ti Oktubre 1.

Naireport a dua ti nadunor iti Pangasinan ken maysa iti La Union gapu iti nasao a bagyo idi Oktubre 1 met laeng.

Nadunor ni Rolando Roger, 18, residente iti Barangay Gayaman, Bimmaley, Pangasinan idi naikaglis iti steel roof;  ken ni Elizabeth Macanas, 50, residente iti Barangay Pemiente, Umingan, Pangasinan a nasugatan iti makannigid a kalub ti matana idi aksidente a nadalapusna ti poste ti koriente gapu iti napigsa nga angin. Agpada dagiti biktima a  naitaray iti ospital iti La Union.

Nagsagrap met ni Nick Basto, 6, residente iti Barangay San Julian Central, Agoo, La Union iti dunor iti ulo idi dinungpar ti maysa a traysikel idi bimmallasiw iti kalsada a mapan gumatang iti kanenna ket naipan iti La Union Medical Center iti dayta met laeng nga aldaw.

Kabayatanna, naipadamag a mapukpukaw ni Jerry Tapiador, 29, residente iti Barangay Bucao, Manaoag, Pangasinan a mapapati nga inyanud ti napigsa nga agus ti Karayan Angalacan idi agarup 2:30 ti malem ti Oktubre 1.

Iti pannakaisurat daytoy, sapsapulen pay laeng dagiti kameng ti search and retrieval operation ni Tapiador.

Segun iti nasao a report, mapattapatta nga agdagupen iti P1,047,333.00 ti rinuk-atan a pondo dagiti LGUs ken DSWD-1 para iti pannakatulong dagiti biktima ti bagyo ditoy a rehion.

Nupay naibayog ti  Signal No. 3 iti Ilocos Sur, saan unay a narikna dagiti agindeg agsipud ta pangapsuten ti angin ken di unay napigsa ti tudo nga imbuyat ti bagyo iti probinsia.

Kas maibatay iti report, adda pay dagiti barangay roads iti Pangasinan a di makapagna dagiti light vehicles agsipud ta nalayus dagiti kalsada a kas iti San Carlos-Calasiao road, Mancup Section; Urdaneta Junction-Dagupan-Lingayen Road (via Zambales Tapuac-Lucao Section; Santa Barbara old road, Maningding section; Dagiti barangay a Talibaew,  Lasip, San Vicente, Banaoang, Longos, Panaga, Laoac; Pandayan-Gabon;  Lucao, De Venecia road, Tapuac, Mayombo; Herrero Perez; Pogo Grande; Pogo Chico; Bonuan Guesset; kasta met dagiti barangay roads iti ili a Sta. Barbara, Bayambang, Labrador, Dagupan City, ken Calasiao.

Nupay kasta, makapagnan dagiti lugan kadagiti sabali pay a nasional ken sekundaria a kalsada, segun iti report.#