Footer

1 natay, 6 nadundunor iti head on collision ti dua motorsiklo

SAN JUAN, Ilocos Sur – Maysa ti natay idinto a nasugatan ti innem iti panagdinnungpar ti dua a motorsiklo iti kalsada nasional iti Barangay Lapting ditoy nga ili idi malem ti Agosto 5.

Natay ni Raymundo Duldulao, Jr. y Sunio, 21, baro, ken residente iti Barangay Barbarit, Magsingal, Ilocos Sur idinto a nasugatan ti kinasakayna ken dagiti naglugan iti Euro motorcycle a kinadinnungparda idi agarup 5:45 ti malem ti nadakamat nga aldaw.

Karaman kadagiti nadunor ti insakay ti biktima a ni Ryan Suetos y Serrano, 28, baro, ken residente of Brgy Quezon, Cabugao, Ilocos Sur; ken da  Janice Obero y Dumaog, 15, nagmaneho iti Euro motorcycle, ken dagiti back riders a pakaibilangan da Diana May Villon y Dahilig, 14; Lester Vercida y Aquino, 11, agpapada a residente iti Barangay Baliw, San Juan, Ilocos Sur; Maria Eissej Reprima y Verador, 15,  residentr iti Barangay Bannuar; ken Lei Chris Espirin y Osilios, 15, ken  residente iti Barangay Dacutan, Magsingal, Ilocos Sur.

Naammuan iti inisial nga inbestigasion dagiti polis nga agpaamianan a direksion ti Euro motorcycle a minaneho ni Obero idinto nga agpaabagatan ti Motoposh Intense motorcycle a minaneho ni Duldulao ket iti nakapasamakan ti aksidente, mapapati nga inobertekan ni Duldulao ti maysa a truck a nakaigapuan iti head on collision ti luganda iti Euro motorcycle.

Gapu iti pigsa iti panagdinnungpar dagiti dua a lugan, nagsagrap amin dagiti nagsakay kadagiti dunor iti nadumaduma a paset ti bagida ket naitarayda iti Pira Hospital iti Cabugao para iti pannakaagasda sada naiyalis iti Gabriela Silang General Hospital iti Vigan City.

Pimmusay ni Duldulao bayat ti pannakatamingna iti GSGH.

Nailanad iti report manipud iti polis San Juan a mapapati a nakainom ti biktima ken ti kinasakayna idi napasamak ti aksidente idinto nga adu unay dagiti nagkakalubbon iti Euro motorcycle a pasig a menor de edad.

Agpada dagiti nagmaneho nga awan ti aruatda a helmet, segun pay iti polis.#