1 natay, 7 nadundunor nagsina nga aksidente iti lugan

NARVACAN, Ilocos Sur – Nakainom amin dagiti tallo a nagmaneho iti motorsiklo ket daytoy ti maitudtudo a culprit iti aksidente a napasamak sadiay Alilem, Ilocos Sur idi Mayo 17 ken ditoy nga ili idi Mayo 18.

Naideklara a dead on arrival iti Ilocos Sur District Hospital ditoy nga ili ni Thomas Casica, 55, naasawaan, ken residente iti Barangay Lingsat, Sta. Maria, Ilocos Sur gapu kadagiti grabe a dunorna kalpasan a dinungpar ti luganna ti landmark post iti igid ti kalsada sadiay Barangay Quinarayan, ditoy nga ili idi parbangon ti Mayo 18..

Nagsagrap met iti dunor dagiti ulo ken saka dagiti insakayna a da Ericson Cadabos y Casica, 24, baro, ken residente iti Barangay San Pedro, Narvacan, Ilocos Sur ken maysa pay a di nabigbig a kaduada nga awan pay puotna.

Segun iti doktor a nangasikaso kadagiti biktima, positibo amin dagitoy iti arak ken awan ti helmetda.

Iti panagimbestiga dagiti polis, agpaabagatan a direksion ti motorsiklo a minaneho ni Casica idi dinungparna ti landmark post iti junction sadiay Barangay Quinarayan ditoy nga ili.

Kabayatanna, nakainom met iti arak dagiti dua a drayber ti motorsiklo a nainbolbar iti aksidente sadiay Barangay Anaao, ditoy nga ili idi malem ti Mayo 17.

Kas maibatay iti report manipud iti polis ditoy, adda iti inpluensia ti arak da Edwin del Moral y Panasan, 21, baro, drayber iti Euro 150 motorcycle, ken residente iti Old Central, Sudipen, La Union; ken ni Jonathan Gabat y Lubadi, addaan legal nga edad, naasawaan, drayber iti Euro Space 2 motorcycle, ken residente iti Sitio Macdaar, Poblacion, Alilem, Ilocos Sur, idi nagdinnungpar dagiti luganda iti provincial road a sakup ti Barangay Anaao idi agarup 3:15 ti malem ti Mayo 17.

Segun iti blotter, agpadaya a direksion ti Euro Space 2 a minaneho ni Gabat ngem iti pagkurbaan, mapapati a kimmaut iti sabali a linia a puon ti panagdinnungparda iti Euro 150 a minaneho ni Del Moral.

Kas resulta, nagsagrap iti dunor ni Del Moral iti ulo a nakapukawan ti puotna iti apagbiit, idinto a nagsagrap iti cerebral concussion ti back rider a ni Justin Del Moral y Galibut, 7, ken mapapati a nakabulloan ti abaga ni Rbysan Del Moral y Gao-ay, 10.

Nagsagrap met iti dunor iti makannawan a kiday ken rupa ni Gabat. Saan a naan-ano ti back riderna a ni Carol Gabat y Lubadi, 17, awanan asawa, ken residente met laeng iti Sitio Macdaar, Poblacion, Alilem, Ilocos Sur.

Immuna a naitaray dagiti biktima iti Tagudin General Hospital & Capillariasis Center, Tagudin, Ilocos Sur sada naiyalis iti ITRMC, San Fernando City, La Union.#

Ipagpaganetget ti kapolisan ditoy probinsia ti saan a panagmaneho dagiti motorista no nabartekda ken awan helmetda, ngem adu latta ti di mangitaltalek iti daytoy a ballaag.#