1 natay, 8 nadundunor iti tallo nagsisina nga aksidente

NARVACAN, Ilocos Sur -Maysa ti natay idinto a walo ti nasugatan iti tallo nga aksidente iti San Ildefonso, Sta. Maria ken ditoy nga ili nga agpapada a napasamak idi malem ti Abril 26.

Naireport a natay ni Evelyn Cambe, residente iti Barangay Banglayan, ditoy nga ili, ken nadundunor a puon ti nakayospitalanda da Deo Cambe, y Agustino, anak ti natay; Joel Sanidad, ken Marjun Querol y Cabalar, 46, naasawaan, agpada a residente iti Barangay San Jose, Narvacan; Constantino Garrino y Funtanilla, 55, naasawaan, residente iti Barangay Tablac, Candon City; Joel Garrino y Garrino, 26, baro; ken Christopher Balicoco y Antalan, 35, naasawaan ken agpada a residente iti Barangay Tablac, Candon City.

Iti report manipud iti polis ti Narvacan, agpada nga agpalaud a direksion ti XRM motorcycle, maris nalabaga, a minaneho ni Cambe ken ti XRM motorcycle, maris asul, a minaneho ni Joel Sanidad idi mapapati a dinungpar ti  naud-udi ti immuna a nakaigapuan ti pannakadunor da Cambe ken ti inana, ken ni Sanidad ken ti kalubbonna a ni Querol.

Naitaray dagiti biktima iti Central Ilocos Sur District Hospital ngem naideklara ni Evelyn Cambe nga awanen ti biagna.

Iti aksidente iti San Ildefonso, naireport nga agpaamianan ti passenger jeep a minaneho ni Loreto Tabarrangao, 38, naasawaan ken residente iti Barangay Pangpangdan, Sto. Domingo, Ilocos Sur; ti Isuzu DMAX a minaneho ni Jeremy Seguban y Somera, 61, naasawaan ken residente iti Barangay Bonifacio, Cabugao, Ilocos Sur idi inobertekan ti passenger jeep ti maysa a lugan ngem mapapati a nadungsona ti makannigid a paset ti Isuzu DMAX, kasta met a kinadinnungparna ti  sumungad a Toyota a kotse a minaneho ni Jimmy Ayson y Idian, 39, naasawaan, ken residente iti Barangay Ballaigui, Sinait, Ilocos Sur  ken nakadunoran ni Ayson ken dagiti inluganna a da Paulino Concepcion ken Merlene Concepcion y Cala, 14, balasitang ken agpada nga agnaed iti Barangay Ballaigui, Sinait, Ilocos Sur.

Naitaray dagiti tallo iti Metro Vigan Cooperative Hospital.

Saan a naan-ano dagiti nagmaneho iti passenger jeep ken ti Isuzu DMAX.

Kabayatanna, iti inisial nga inbestigasion iti aksidente iti Sta. Maria, Ilocos Sur, naammuan nga agpaabagatan ti Honda TMX 155 a traysikel a minaneho ni Constantino Garrino y Funtanilla ken ti Motorstar Motorcycle 125 a minaneho ni Teodoro Narciso y Combis, 45, naasawaan, ken residente iti barangay San Juan West, Pilar, Abra idi dinungpar ti Honda ti Motorstar.

Gapu iti pigsa ti pannungpar, nagbaribar ti traysikel iti kalsada a nakadunoran ti nagmaneho ken dagiti pasaherona a da Joel Garrino ken Christopher Balicoco ket agpapadada a naitaray iti Central Ilocos Sur District Hospital iti Narvacan, Ilocos Sur.

Saan a naan-ano ti nagmaneho iti motorsiklo a ni Narciso ken ti inlubbonna a ni Jay-R Domingo y Canaoay, 25, baro ken residente iti Barangay San Juan West, Pilar Abra.

Nakaro ti dadael dagiti dua a lugan.#