1 natay, 9 nasugsugatan iti 5 nagsisina nga aksidente dagiti lugan

STO. DOMINGO, Ilocos Sur – Maysa ti natay idinto a 9 dagiti nasugsugatan iti aksidente a nagsasaruno a napasamak iti las-ud ti tallo nga aldaw sadiay Burgos, San Ildefonso, ken ditoy nga ili manipud Oktubre 26 agingga iti Oktubre 28.

Maysa ti natay idinto nga innem a tattao a pakairamanan ti tallo nga ubing dagiti nasugsugatan iti aksidente a napasamak iti national highway a sakup ti Barangay Puerta Real, Sto. Domingo idi agarup 3:30 ti malem ti Oktubre 26 a nakainbolbaran ti maysa a motorsiklo ken  maysa a traysikel.

Naireport a natay ni Roselly Igne y Miranda, naasawaan, ken residente iti Barangay Rang-ay, Sinait, Ilocos Sur iti ospital a nakaitarayanna idinto a nasugsugatan da Angel Igne y Miranda, 12, Graden V pupil ti Sinait East Central School, ken residente iti Barangay Rang-ay; ni Elisa Felipe y Miranda, 47, naasawaan, ken residente iti Barangay Baracbac; Melisa Respicio y Felipe, 3, residente iti Barangay Bariquir; Rodney Felipe y Valdez, 3, ken residente iti Barangay Baracbac, aminda iti Sinait, Ilocos Sur.

Saan a naan-ano ti drayber ti traysikel me  ni Marc Renz Igne y Miranda, 9, Grade 3, agbasbasa iti Sinait East Central School, ken residente iti Barangay Rang-ay, Sinait, Ilocos Sur ken ti drayber ken tallo pay  a pasahero ti Honda Civi.

Naammuan iti report manipud iti polis-Sto. Domingo nga agpaamianan ti Honda Civic a minaneho ni Sharon Ubaldo y Lorica, 34, naasawaan, caregiver, addaan iti student permit, ken residente iti Barangay Resurreccion, San Juan, Ilocos Sur idi mapapati a kellaat a nagsardeng idi aksidente a dinungpar ti traysikel manipud iti likudan.

Kas resulta, naipalladaw ni Roselly a backrider sumagmamano a metro ti kaadayo manipud iti point of impact ket nagsagrap iti dunor iti ulo.

Pimmusay ni Roselly iti Tolentino Clinic and Hospital bayat ti pannakataming dagiti sugatna.

Nakaro ti dadael dagiti dua a lugan.

Sabali pay nga aksidente ti napasamak iti national highway a sakup ti Barangay Camestizoan, Sto. Domingo idi agarup0 5:30 ti malem ti Oktubre 28 a nakainbolbaran ti Kawasaki  Fury a minaneho ni Alejandro Fagela y Tisado, 70, retirado a head teacher, ken residente iti Barangay Vacunero, Sto. Domingo, ken ti Suzuki Raider a minaneho ni Emmanuel Villamor y Pacano, 35, naasawaan, mekaniko, ken residente iti Taft Street, Bangued, Abra.

Iti panagimbestiga dagiti polis, agpaabagatan a direksion ti Suzuki Raider idinto a naggapu ti Kawasaki Fury iti lauden nga abaga ti kalsada ket mapapati a simrek iti highway idi aksidente a nagdinnungparda.

Kas resulta, nagsagrap ni Villamor kadagiti garadgad iti ima ken tumengna ket naitaray iti Rural Health Unit ti Sto. Domingo para iti pannakaagasna.

Saan a naan-ano ni Fagela.

Nagareglo dagiti dua tapno saanen a dumanon  pay a kaso iti korte.

Kabayatanna, dua ti napasamak nga aksidente idi malem ti Oktubre 26 ken rabii ti Oktubre 27 iti national highway a sakup ti Barangay Lucaban, Burgos, Ilocos Sur.

Segun iti report manipud iti polis-Burgos, napasamak ti immuna nga aksidente idi agarup 1:49 ti Oktubre 26 ket naimbolbar ditoy ti maysa a Honda Bravo a maris asul a minaneho ni Gualberto Labanda y Abayan, naasawaan, 39, chief tanod ken residente iti Barangay Dirdirig, Burgos, ken ti nangisit a Honda XRM 125 a minaneho ni Mitchell Guzman y Ponsoy, 34, naasawaan, ken residente iti Barangay Nanangduan, Pilar, Abra

Segun iti inbestigasion, agpaamianan ti Honda Bravo idinto a kasabatna ti Honda XRM idi nagdinnungparda.

Naitaray ni Labanda iti Ilocos Sur District Hospital idinto nga iti Reyes Clinic and Hospital ni Guzman nga agpada a nagsagrap kadagiti sugat.

Naikustodia dagiti lugan a nainbolbar iti police station.

Iti met aksidente idi agarup 3:16 iti agsapa ti Oktubre 27, maysa a Honda SR motorcycle ken maysa a Mountain Bike dagiti nainbolbar ken nakasugsugatan dagiti naglugan kadagiti dua a lugan.

Agpadaya a direksion ti motorsiklo a minaneho ni Johnfimm Waacon y Rosario, 17, baro, kalubbonna da Danlee Rosario y Mariano, 19, ken Jerry Pascua y Dalisay, 23, agpada a baro ken residente iti Brgy Paduros, Burgos ket iti nakapasamakan ti aksidente, inobertekan ti motorsiklo ti maysa a di nabigbig a lugan ket nadungparna ti bisikleta nga aggapu iti kasungani a direksion a nagresulta iti pannakadundunor ti nadumaduma a paset ti bagi ti drayber ti motorsiklo ken dagiti inluganna ken naglugan iti bisikleta.

Agpapada nga intaray dagiti nagresponde a polis dagiti nasugatan a naitaray iti Reyes Clinic and Hospital iti Sta. Maria, Ilocos Sur.

Iti sabali a bangir, bus ken motorsiklo ti nainbolbar iti aksidente a napasamak iti national highway sadiay Barangay Gongogong, San Ildefonso, Ilocos Sur idi agarup 10:30 ti rabii ti Oktubre 25.

Iti report manipud iti polis-San Ildefonso, agpada nga agpaabagatan Florida Bhs a minaneho ni Fernando Guerrero y Mamuad, 44, naasawaan, ken residente iti Barangay 24, San Nicolas, Ilocos Norte ken ti 125 cc Honda Wave motorcycle a minaneho ni Emmanuel Sagun y Ignacio, 21, baro, ken residente iti Burgos, Ilocos Norte, idi inobertekan ni Sagun ti bus ngem saanna a nakontrol ti manibela ket naikras ti lugan iti abaga ti kalsada idinto a naipalladaw ti drayber iti sirok ti bus.

Nagsagrap ni Sagun kadagiti nadumaduma a sugat iti baina ket naitaray iti Gabriela Silang General Hospital.

Naipan met ti drayber ti bus iti police station para iti pannakapalutpotna ken umisu a disposion.##