1 ti natay, 1 nasugatan iti nagsina a pammaltog

GALIMUYOD, Ilocos Sur – Dua a nagsina nga insidente ti pammaltog ti  napasamak sadiay Sinait ken ditoy nga ili idi Hulio 30 a nakatayan ti maysa ken grabe a nakasugatan ti sabali.

Pimmusay ni  Edwin Valdez y Pagad-o, 33, naasawaan, CAFGU member ti CAA 3rd IB, 701B, 71D ken residente iti Barangay Sabangan Bato, Galimuyod, Ilocos Sur gapu iti sugatna iti barukong ken tianna kalpasan a pinaltogan ni  Danilo Guyo y Quiles, 57, naasawaan, CAFGU ken residente iti Barangay Poblacion, Banayoyo, Ilocos Sur idi agarup 11:30 ti rabii ti Hulio 30 iti lakub ti CAFGU detachment sadiay Barangay Bitong, ditoy nga ili.

Naammuan iti report manipud iti Galimuyod police station a naka-duty a guardia ti biktima iti kampo idi rimmuar ti suspek manipud iti kubona ket mapapati a nakitana ti maysa a lalaki iti asideg ti kubona.

Pinasardeng ti suspek ti lalaki ngem saan a simmungbat daytoy ket mapapati nga inkasana ketdi ti paltogna a nakaigapuan ti panangpaltog ti suspek kenkuana iti namitlo a daras.

Intaray dagiti kakaduada ti biktima iti barangay proper ngem nagsatan daytoy bayat ti panagur-urayda iti lugan.

Boluntario a simmuko ti suspek ken ni Sgt. Edwin Gamboa, detachment commander.

Mapapati a Cal 30 (garand rifle) ti naaramat iti pammaltog kas maibasar kadagiti tallo a cartridge shells a nasarakan iti crime scene.

Kabayatanna, nabara nga argumento ti nakagapu iti pannakapaltog ti maysa a karpintero idi agarup 7:55 ti rabii iti daytoy met laeng nga aldaw sadiay Barangay Cabangtalan, Sinait, Ilocos Sur.

Pinaltogan ni Glenn Yadao y Paguirigan, 36, baro ken residente iti Barangay Quibit-Quibit, Sinait, Ilocos Sur ni Jhun Ilac y Ventura, 44, naasawaan, ken residente iti Barangay Katipunan, Sinait.

Iti panagimbestiga dagiti polis, naaddaan iti nabara nga argumento bayat ti panaggiinom ti suspek ken ti biktima agraman ti anak daytoy a ni Jackson Ilac y Baccay, 20, baro, laborer;  Norwyn Boton y Ibarra, 30, naasawaan ken Relito Delfinado agpada a CAFGU member; Ronnie Yadao y Paguirigan, 31; Christopher, Jeffsy ken Eugene Gundran ken dadduma pay a di pay nabigbig a kainumanda a nagresulta iti panagriringgorda.

Mapapati a pinalek ni Glenn Yadao ti makannigid a pispis ni Relito Delfinado ket naganawa ni Jhun Ilac ngem dinanog ketdi ni Ronnie Yadao a puon ti naggubalanda.

Kellaat a nangasut ni Glenn Yadao ket pinaltoganna ni Ilac a nagsagrapanna iti sugat iti makannigid a luppona ken makannawan a siketna.

Naitaray ni Ilac iti Corpuz Clinic and Hospital iti Sinait sa naiyalis iti Don Mariano Marcos Memorial Hospital and Medical Center, Batay City, Ilocos Norte.

Nasarakan iti nakapasamakan ti riri ti tallo a kapsula manipud iti cal .45.

Nangiwayat dagiti polis iti hot pursuit operation maikontra kadagiti naglibas a suspek a nagtungpal iti pannakaaresto da Glenn ken Ronnie Yadao.

Iti pannakaisurat daytoy, addan iti kustodia ti Sinait police station dagiti dua a suspek para iti umisu a disposision.#