No. 1 most wanted person ti SC police station, naaresto

BAGABAG, Nueva Vizcaya -Inaresto dagiti nagtitipon nga elemento ti kapolisan ti No. 1 a most wanted person iti Sta. Cruz police station sadiay Barangay Villaros ditoy nga ili idi agsapa ti Agosto 6.

Inaresto dagiti nagtitipon nga elemento ti Sta. Cruz police station nga indauluan ni Inspector Diony Victorio Balancio, Ilocos Sur CIDG, Bagabag Police Station nga indauluan ni Inspector Filipino A. Flaris ken 2nd Manuever Company RPSB, ni Rogelio Javar y Silapan, 41, naasawaan, ken residente iti Barangay San Antonio, Sta. Cruz, Ilocos Sur.

Nakalista a Top 1 most wanted iti Sta. Cruz police station, naaresto ni Javar babaen ti bileg ti warrant of arrest nga inyisio ni Judge Gabino Balbin, Jr. ti RTC Branch 23, Candon City gapu iti kasona a murder a nai-docket babaen ti CC No. 3105. Sabali pay ti warrant of arrest nga inyisio ni Judge Richard T. Domingo ti 11th MCTC Sta. Cruz-Sta. Lucia, Ilocos Sur maikontra ken ni Javar gapu iti kasona nga attempted murder nai-docket babaen ti CC No. 5333.

Awan ti nairekomenda a piansa ni Javar iti kasona A murder idinto a P20,000.00 ti piansana iti attempted murder.#