MAGSINGAL, Ilocos Sur – Sangapulo a mangngalap a naitawtaw iti kabaybayan gapu ken ni Bagyo Dodong ti naalaw iti Sta. Cruz ken ditoy nga ili idi Hunio 11 ken 12.
Immuna a naalaw idi agarup alas 12:30 ti Hunio 11 ni Jesus Pungad y Gatchalian, 31, naasawaan, ken residente iti Concordia, Bolinao, Pangasinan, kalpasan a nasaripatpatan iti tapaw ti maysa a fish cage a kawayan iti kabaybayan a sakup ti Barangay Mantanas, Sta. Cruz, Ilocos Sur.
Segun iti biktima, timmapogda nga agkakadua iti baybay idi Hunio 7 ket idi addadan iti taaw, intawtaw ida dagiti dadakkel a dalluyon maigapu iti Bagyo Dodong agingga a naisalat ni Pungad iti maysa a fish cage iti Barangay Mantanas.
Naalaw ni Gabriel V. Vesta, 29, naasawaan ken residente iti Barangay Arosan, Bolinao, Pangasinan idi agarup alas 10:45 ti bigat ti Hunio 12.
Kinuna ni Ismael Artillero, mangngalap a residente iti Barangay Puro, Magsingal, Ilocos Sur a nasaripatpatanna ni Vesta nga agpatpataw babaen ti ikakapetna iti maysa a kayo isu nga inalawna.
Naipan ni Vesta iti Magsingal police station ket babaen ti tulong ti polis ditoy, nakapatangna ti maysa a kabagianna a nagkiddawanna a mapatulodan iti kuarta a pagpletena nga aggawid.
Idi agarup alas 2:00 ti malem ti dayta met laeng nga aldaw, walo a mangngalap ti nasalaw ti agkabsat a mangngalap a taga-Barangay Puro nga agpatpataw iti kabaybayan a sakup ti barangayda.
Nainaganan dagiti agkakapsuten a mangngalap gapu iti bisin ken wawda a naitawtaw iti taaw a da Gregorio Santillan y Murcia, 52, naasawaan; Jovani Murcia y Montes, 22, baro; Marwin Ladao y Tongson, 19, baro; Philip Murcia y Molate, 20; ken Felix Relator y Cagigas, 51, balo, agpapada amin a residente iti Barangay Cato, Infanta, Pangasinan; Rosalino Perges Jr. y Murcia, 28, baro ken Joel Murcia y Lapis, 32, naasawaan, agpadada a residente iti Barangay Bayambang, Infanta, Pangasinan; ken Nestor Lapis y Molato, 36, ken residente iti Barangay Poblacion, ti met laeng Infanta, Pangasinan, agraman ken ni Gabriel V. Vesta nga immun-una a naalaw.
Segun iti maysa kadagiti mangngalap, timmapogda iti baybay idi rabii ti Hunio 7 ngem dinadael dagiti dadakkel a dalluyon ti bangkada idi rabii ti Hunio 9.
Aggawiden manipud panagkalapda da Eleno Tabigne y Torricer, 41 ken Bartolome Tabigne, 46, agpada a taga-Barangay Puro, Magsingal idi nasalawda dagiti walo a mangngalap nga agpatpataw babaen ti ikakapetda kadagiti parte ti nadadael a bangkada.
Naipan amin dagiti naalaw a mangngalap iti Magsingal District Hospital para iti medical check-up.
Naipaima dagiti mangngalap iti Dasul police station, Dasul, Pangasinan idi malem ti Hunio 13.#