Footer

10 ambulansia, naiwaras district hospitals

VIGAN CITY – Sangapulo nga ambulansia ti inyawat ni Gov. Deogracias Victor “DV” Savellano kadagiti district hospitals ditoy idi Pebrero 23 kas paset ti programa ti gobierno probinsial a mangpasayaat iti serbisio dagitoy a balay-pagagasan.

Dua nga ambulansia ti naited iti Gabriela Silang General Hospital idinto a saggaysa dagiti pito pay a district hospitals a pakairamanan ti Sinait District Hospital, Magsingal District Hospital, Central Ilocos District Hospital, Bessang Pass Memorial Hospital, Salcedo District Hospital, Sta. Lucia District Hospital, ken Tagudin General Hospital.

Kinuna ni Savellano a napaadda dagiti ambulansia kalpasan a napirmaan ti maysa a katulagan iti nagbaetan ti opisina ti Presidente ken ti gobierno probinsial a 40% ti ibaklay ti gobierno probinsial idinto a 60% ti aggapu iti Philippine Charity Sweepstakes Office.

“Maysa pay daytoy a wagas tapno mapasayaattayo ti kalidad ti serbisio a maipaaytayo kadagiti kaprobinsiaan aglalo kadagiti napanglaw,” kinuna ti gobernador.

Iti met interview ken ni Dr. Winston Aguirre kinunana a daytoy ti maysa kadagiti batonlagip ti administrasion ni Savellano.

“Ipakita daytoy a prioridad ti salun-at dagiti kaprobinsiaan,” kinuna ti doktor.

Kabayatanna, umabot iti 110,000 a tilapia fingerlings ti imbulos da Savellano ken ti agriculture office ti probinsia iti lima nga ili iti maikadua a distrito ti probinsia idi Pebrero 17.

Daytoyen ti maikatlo a panagiwaras ti gobierno probinsial iti lames kadagiti kadandanuman babaen ti programa nga Ilocos Sur Development of Aquamarine (ISDA) nga addaan iti panggep a mangpaadu iti lames kadagiti bagi ti danum tapno masupusopan ti panagkurang ti suplay ti lames ditoy probinsia.

Karaman kadagiti ili a nakaibulosan dagiti lames ti Santiago, Sta. Maria, Burgos, Narvacan ken Santa.

Agtuloy ti ISDA project agingga a maikkan amin nga ili iti Ilocos Sur, kinuna ti gobernador.#