10 balay, naiyawat kadagiti benepisario

VIGAN CITY – Agdagup iti 10 a balay ti naiyawat kadagiti benepisario ti pabalay iti San Julian ditoy siudad itay nabiit.

Kinuna ni Mayor Eva Marie nga inkari dagiti agassawa nga Edwin ken Lani Raquel iti pannakaituloy a mabangon dagiti 15 pay a balay a nataktak ti pannakapatakderda gapu ta mapapati a nagkaproblema ti Gawad Kalinga a nangipaimaanda iti pondo para iti daytoy a proyekto.

Naammuan a nairugi ti pannakapatakder dagiti nasao a balay idi kanikatlo a tawen ngem nataktak agsipud iti problema iti Gawad Kalinga.

Segun iti mayora,  timmulong ti city government ken ti Rotary Club iti pannakaituloy ti pannakaipatakder dagiti balay ket maragsakan ta nalpas ti 10 a balay a naiyawat kadagiti benepisario itay nabiit.

Paset ti katulagan a tumulong dagiti benepisario a makipagbangon iti balay a maited kadakuada.#