10 biddut dagiti nagaplay iti trabaho

(Nasurat daytoy idi kanikasangapulo a tawen ngem kas pammaliiwmi, adu dagiti sumsumrek iti trabaho a dida ammo ti ar-aramidenda, nangruna no ania ti rumbeng a mailanad iti resume wenno aplikasionda, ngarud ipablaakmi manen kas panangkibin kadagiti agbirbirok iti panggedan. -Ed.)

 

NALAKA-a-narigat ti sumrek ti trabaho. Nalaka ti sumrek iti uneg ti opisina a pagaplayan, ngem narigat ti rummuar a leppay ti abagana kalpasan ti interbio.

Kadagiti kagradgraduarna, adtoy man dagiti 10 a biddut dagiti nagaplay iti trabaho, kas insurat ni Laura Gassner Otting, presidente ti Nonprofit Professional Advisory Group.

1. “Insert job here”  Daytoy daytay awan ti inkabilna nga aplayanna a trabaho. Nagaplay laeng iti uray ania a posible a position a kas maiyannatop iti inadalna ken ammona a kas iti indetaliena iti resume.

Panagduadua iti bagi ti kayat a sawen daytoy, ta awan umno a turongen ti resume. Awan ti pangpanggepen a gun-oden nga aplayan. Ngarud, no addaanka iti panagduadua, agduadua ngarud met dagiti posible nga employer a mangiyemplo kenka. Isu a no nagaplayka iti trabaho, ibagamon a dagus no ania dayta nga aplayam a saan ket a dagiti kualipikasionmo ti ibagam ken mangidiktar no ania a posision ti pangiseksekanda kenka iti kompania a sumsumrekam.

Saan a trabaho dagiti aginterbio no ania a posision ti rumbeng a para kenka, no di ket trabahoda laeng ti mangammo no kualipikadoka met laeng wenno saan iti trabaho nga ap-aplayam. Ngem no awan ti trabaho nga aplayam, ania ngarud ti ammuenda pay kenka? Three point shot a ti resume iti waste basket!

2. Read and follow directions. Daytoy ket para kadagiti kompania wenno korporasion nga agited iti application form a pirmaan. Ket natural laeng a suroten dagiti direksion.

Saan laeng a kadagiti application form a suroten ti direksion, tungpalen pay a suroten dagiti direction a nailanad iti anunsio ti kompania iti panagsapsapulda iti posible nga awatenda nga empleadoda. Kas koma no sadino ti umno a pangiyadresam iti aplikasionmo. Rumbeng laeng nga iti maikanatad a tao ti pangiturongam kadayta aplikasionmo ken iti adresna. Ta amangan no sabali a tao ti inkabilmo a pagturongan ti aplikasionmo. Ammom aya no di payen makudkod dayta a tao ti nagatel a sellangna iti kaadu ti trabahona ken asikasuenna sa ket isu pay ti nangiyadresam kadayta aplikasionmo? Ay, amangan no ibasurana a dagus ti aplikasionmo. Ania ti bibiangko kenka, kunananto pay ketdi. Sayang ti nagbanbannogan ken nagpuypuyatam nga inaramid nga aplikasion!

Adda met dagiti ads nga agipatulodka iti resume babaen ti koreo wenno iti email.

No koreo, surotem amin a direction, kas iti naibaga iti ads. Dimo naynayonan. No babaen met ti email, nasken a simple laeng ti pamay-am ken rebisarem a nalaing daytoy.

3. Think about the message you send. No babaen ti voice mail nga ipatulodmo ti aplikasion wenno resume, nasken a praktisem pay nga umuna amin nga ibagam sakbay nga agirekordka. Nasken a nalawag, nabukel ken saan nga agguddeguddeng ti timekmo. Nasken met nga awan ti makasinga wenno sumrek a sabali a timek a mangipaay iti disturbo iti panagirekordmo. Amangan ketdi no adda kagrupom iti voice mail nga impaw-itmo, kas iti nailalaok a timek ti ubing nga aglalaaw, agkatkatawa wenno agsangsangit, wenno adda agtataul nga aso iti asidegmo adda nakapigpigsa a boses manipud iti radio wenno iti telebision, wenno ania la ditan a kumanabtuog a mangngegda, asus, saanda la ketdin nga ituloy a denggen dayta voice mailmo. Nasken a dayta laeng timekmo ti mangngeg, awanen ti sabali pay.

4. A Poor resume. Kuna ni Otting nga adu kanon dagiti resume nga impalapalna iti basuraan. Ken adu metten dagiti resume nga inrekomendana kadagiti hiring committee.

Inyunay-unay ni Otting a madi ken di nasayaat a resume dagiti agaplikar a mangibagbaga kadagiti aramidda ken kabaelanda imbes a dagiti koma naaramidanda ken a nasayaat ti resultada.

No maminsan ngamin ket kayattayo ti agpaimpres ket ikabiltayo aminen nga ammotayo nga aramiden ken kabaelan ngem nalibtawantayo met nga imbaga dagiti naaramidantayo ken bunga daytoy a naaramidan.

KUNA ni Otting a ditay kano isursurat dagiti hobbies. Umno unay. Trabaho ti sumrekam, apay a dagiti hobbies wenno pagesmam ti lawlawatem? Awan ti bibiang ti trabaho kadagiti hiligmo ta ti trabaho ti yopreserda  kenka, saan ket a dagiti pagesmam. Amangan no kunaento pay ketdi dagiti human resources (HR) specialist: “Pasig met nga ay-ayam ti ammom, saan a trabaho!” No kastoy ti simrek iti ulo ti HR, awanen ti maaramidam pay. Nasaysayaat no ibagam laengen dagiti bunga wenno resulta dagiti inaramidmo iti napalabas nga employermo wenno iti departamento a yanmo no daytoy ket agaplayka iti nangatngato a position.

5. Spell check. Kuna ni Otting a 9 kadagiti 10 ti addaan iti typographical error, extra space, missing hyphen ken dadduma pay a kamali wenno biddut a diacritical marks in writing. Kasapulan ti panagannad iti encoding wenno typing iti application wenno resume. Saan a makaay-ayo a kitaen ti maysa nga aplikasion wenno resume nga adda dagiti biddut iti spelling, nakurusan wenno naikkan iti snowfake. Pammaneknek laeng daytoy ti kinaawan panagannad ti aplikante. Ket agballatek kenkuana daytoy a panagliwayna.

Ti tao a saan a naannad kadagiti kakastoy a banag ket saanto met a naannad iti trabahona. Ngarud automatiko a saan a maawat.

(Adda tuloyna)