10 biddut ti agbirok iti trabaho

Ni Jaime M. Agpalo, Jr.

 

6. Dream, Within Reason: Dagitoy dagitay agaplay iti nangangato a position iti laksid ti kinakurang ti ammoda. Kayatda ti makadanon nga insegida iti tuktok ti corporate ladder a dida man la a pulos limmasat iti maikalima wenno maikanem a tukad wenno kaarngina.

Wen, saan a kayat dagiti kompania ken korporasion ti tao a sobra unay ti kinaambisiosona. Saan a dakes ti agambision ngem nasken unay nga adda dayta iti umno a lugar. Amangan no ma-charge-ka pay iti violation a “wrong parking wenno obstruction, hehehe!” No agambisionka, nasken nga addaka iti umno a lugar ken panawen.

7. Know your weakness. Panangannugot kadagiti pagkapsutan nga aramiden, ngem ketdi iti kabiitan a panawen ket masursurom dayta a banag ken ad-adda pay a maitaguyodmo ti idudur-as ti kompania wenno iti korporasion. Ta kaadduanna met dagiti aplikante ket saanda pay laeng a pamiliar kadagiti trabaho a datnganda iti kompania/korporasion, saan kadi?

Ngem no aginlalastog ken aginpopogika a dimo gayam ammo ti ar-aramidem no kas pagarigan kiddawenda kenka kabayatan ti interbio wenno apprentice, nalpaskan. Amangan no kunaen pay dagiti naginterbio nga: “imbes a kumita ti kompania, aglugi la ket ngarud kenka.”

Isu a nasaysayaat met laeng no aminemon nga insegida ta isuroda metten nga insegida ti rumbeng nga aramidem, o, di ba?

8. Curiosity is the Key. Kaadda iti interes ti kayat a sawen ti kuriosidad itoy a banag. Addaanka iti dakkel nga interes iti inaplayam a trabaho. Saan kano a dakes iti agsaludsod maipapan iti trabaho a serkam no saanka a pamiliar. Isu met dayta iti adda iti #7. Imbes nga isuda ti mangibaga iti aramidem, sikan a mismo ti agdamag. Tingitingemon dayta bagim no kabaelam dayta a trabaho wenno saan. Kas koma iti panangibagam a saanmo pay a napadasan ti naglako ket no maisuroda kenka dagiti tekniko ti panaglako nalabit nga iti kabiitan a panawen ket dakkel met ngata ti malakuam ta napintas met dagiti tekniko nga isuroda kenka. Wenno saan, ibagamon dagiti limitasionmo wenno pagpatinggaan ti ammom ket no nayonanda dayta nga ammom nasayaat la unay a mangitag-ay kenka ken iti trabahom iti nagan ti kompania.

Ngem kuna ni Otting a dimo kano damdamagen no mano ti rumbeng nga isueldoda kenka. Wen met ngamin, amangan no suspetsaendaka pay a kas maysa a de-tulbek nga empleado. Inton nayemploka, ket namnamaem a nababa unay ti sueldom, di dumawatka iti nayonna. No dika latta kuntento, karbengam met ti umikkat ken agsapul manen iti sabali a mangited kenka iti kapkapnekam a bayad ti trabahom.

9. Thank You Notes. Nakastrekka man ken saan, nasken met nga agyamanka. No nakastrekka, ania ti ammom no iti sumungad nga aldaw ket agaplayka manen iti nangatngato a position? Kinadayaw ti ipasimudaag daytoy nga aramidem.

Kas ti napasamak iti maysa a gayyemko. Saan a napagasatan iti interview, ngem iti naminsan a nagsarakda manen iti personal iti nanginterbio kenkuana, nagyaman daytoy, ken inaminna a dakkel a banag iti nasursurona kadayta nga isasangona iti interview. Kalpasan ti makabulan, nakaawat iti awag a para iti sabali manen nga interview iti isu met laeng a kompania ket naawat.

Uray iti kalpasan ti interview, nasken nga agyamanka iti/kadagiti naginterbio kenka. Ammom aya, no iti dayta a kinadayawmo ket maikkanka iti second priority a kas iti gayyemko? Ta kayat unay dagiti korporasion ken kompania dagiti empleado a manakem ken addaan iti naimbag a galad ken sursuro. Saan met amin a first priority ket maawat. Adda latta nabatbati nga options ti kompania. Ammom aya no sika dayta?

10. Get a second opinion: Wen, nasken nga ipabasam iti sabali dayta resume. Adda dagiti dimo ammo nga ammoda. Adda dagiti mapilawda a madi a nasken a balbaliwam. Ken napintas la unay a pangipakitaam iti resume iti  am-ammom nga HR. Ngem no awan, dagiti gagayyem wenno dagiti nagannak ken kakabsat. Nasaysayaat ti adu a mata ngem ti sangaparis laeng.#