Footer

10 lapida, natakaw iti kamposanto

CAOAYAN, Ilocos Sur – Umadanin ti pannakaselebrar ti piesta dagiti natay ket agsasaruno dagiti matakaw a lapida iti kamposanto ditoy.

Impalgak ni Konsehal Joe Llanes nga addan sangapulo a lapida a natakaw iti kamposanto ditoy idinto nga indagadagna ti pannakasiput dagiti agtatakaw.

Kangrunaan a puntiria dagiti mannanakaw dagiti bronse a lapida agsipud ta mapapati a nangina ti pakailakuanda.

Maysa kadagiti tanem ni dati a PNP member Bonifacio Querubin ti natakawan iti lapida.

Nupay iti Nobiembre 1 ti piesta dagiti amin a sasanto, nakaugalianen a rugian a mapan bisitaen dagiti tattao ti minatayda iti daytoy nga aldaw ken agtuloy iti Nobiembre 2, piesta dagiti kararua.#