10 suspek iti Sta. Cruz pawnshop robbery, nabigbig, nakasuan

STA. CRUZ, Ilocos Sur – Nabigbigen ken napilaan iti kaso dagiti suspek a nainaig iti panagtakaw iti maysa a pawnshop ditoy nga ili idi napan a bulan.

Impakaammo ti Sta. Cruz police a pinilaandan iti robbery iti opisina ti provincial prosecutor da Eric Elwas y Doligas @ Etog, John Dugao Jr. y Baguiwet @ Baguinet wenno Baguines, Gerald Baydo y Coteng, Jepson Beligen y Badillo @ Jap wenno Jefferson wenno Jefferson Beligen ken Sagandoy, Elvis Balweg, Pervis Culiaen, Elmer Pakidaw @ Padicao, Jonathan Atiwag, Freddie Ringor ken Kimbo Sagalto, agpapadada amin a taga-Mountain Province, dagiti suspek iti panagtakaw iti HL Henry Lhuillier Pawnshop a masarakan ditoy nga ili idi Nobiembre 14.

Maipalagip nga idi agsapa ti nadakamat a petsa, inreport ni Francisco Ganapin Jr. iti polis a natakawan ti HL Henry Lhuillier Pawnshop a pagpapaayanna a manedier, pakairamanan ti Farmacia Monlyzamaea.

Natakaw iti pawnshop dagiti nadumaduma nga alahas nga agbalor iti P1,255,100.00; dagiti rematado nga alahas nga agpateg amin iti P128,700.00 ken cash nga agdagup iti P150,850.67.

Nakurimes met iti parmasia dagiti assorted coins nga agdagup iti P1,203.00.

Iti panagimbestiga dagiti polis, nakastrek dagiti mannanakaw babaen ti drainage canal nga agturong iti pawnshop sada nagkali iti abut iti yuunegda iti pagsaldaan.

Idi addadan iti uneg, linuktan dagiti mannanakaw ti vault babaen ti acetylene torch sada kinurimes dagiti linaonna nga alahas ken kuarta.

Tallo nga aldaw kalpasan ti panagtakaw, kinamat dagiti polis ti San Fernando City ti maysa a Toyota Corolla, model 1992 nga addaan plate No. TAR-975 ket napilitan dagiti naglugan a nangtakias iti luganda idi maipasulida.

Malaksid kadagiti assorted nga alahas a mapattapatta nga agbalor amin iti P120,300.00, naibati iti lugan ti maysa nga acetylene tank, 7 laptop/netbook nga adda kakuyogda nga aksesoria, 7 cellular phone, polo shirt nga uniporme ti Supreme Court ken Philippine Coast Guard Auxiliary, assorted nga identification cards ti maysa a Glenn Alvin P. Orille a nakailanadan ti adres a 80A St. Mary St., Urbano Palma, Baguio City a mapapati nga inyisio ti Bureau of Immigration, Military Intelligence Group 15, Samahang Magdalo ken Supreme Court.

Napatalgedan a getaway car dagiti nagtakaw iti pawnshop idiay Sta. Cruz, Ilocos Sur ti naabandonar a kotse idi positibo a binigbig ti maysa a kustomer a kukuana ti aritos a maysa kadagiti alahas a nasarakan iti uneg ti behikulo. (Tawid News)