10 taga-Ilocos Sur, nagturpos iti panagluto

MAKATI CITY – Sangapulo nga agindeg iti Ilocos Sur ti karaman kadagiti nagturpos iti Cooking Essentials Class a naangay idi Disiembre 19 iti Walter Mart ditoy a siudad.

Inesponssoran ti provincial government ti Ilocos Sur, Heny Sison Culinary School, Ayala Foundation ken Jaca Corp. ti nasao a klase a nagpartisiparan iti 17 a kameng ti 25th batch nga enrollees.

Inatendaran daytoy da Bea Zobel Jr., Katrina Ponce Enrile,  Gov. DV Savellano ken dadduma pay a nalatak a personalidad iti cooking industry.

Karaman kadagiti nangisuro itoy a batch dagiti sikat a chefs a kas kada Heny Sison, Luis Chikiamco, Carlo Miguel, Vivian Syyap ken Vicky Vilanueva.

Kinuna dagiti chefs a napintas ti gapuanan dagiti taga-Ilocos Sur idinto a dinayawda ti positibo a kapanunotan ken kinapasnek dagiti partisipante a makasursuro.

Inggunamgunam dagiti chefs a saan koma nga agpatingga dagiti nasursuro dagiti partisipante itoy a panagturposda  no di  masapul nga iyallatiwda kadagiti adalandanto ken iyaplayda dagitoy.

Kabayatanna, sinaludaran ni Zobel  daytoy nga addang ti provincial government ti Ilocos Sur para iti pannakaitandudo ti heritage ken pannakapapintas ti serbisio iti hospitality industry a makatulong iti turismo ti probinsia.

Nagyaman met ni  Savellano kadagiti agtuturay dagiti unibersidad ken kolehio iti Ilocos Sur iti panangapresiarda itoy a programa ken ti panangipalubosda nga agsanay dagiti teachersda.

“Dagitoyto ti mangiyallatiw iti nasursuroda para iti pasnnakaital-o ti hospitality industry,” kinuna ti gobernador.

Dagiti sumaganad dagiti 10 taga-Ilocos Sur a nagturpos iti panagluto: Judy Valencia ken Harold Solis, Ilocos Sur Community College (ISCC); Remedios Galaites, Ilocos Sur Polytechnic State College (ISPSC), Candon; Dr. Tomas Dagdagan, ISPSC, Sta. Maria; Marilou Ursula Quilonio ken Regie Sadiri, University of Northern Philippines (UNP); Liezel Gorospe (Divine Word College of Vigan (DWCV); Winona Santos, Queenie Savellano Paras ken Rena Sonico (ISHORE).#