10 tattao, nadesgrasia iti baro a tawen

SANTIAGO, Ilocos Sur – Sangapulo a tattao a pakairamanan ti drayber ti naiyospital kalpasan a nainbolbar iti aksidente ti luganda bayat ti panagdaliasatna iti abagatan a direksion sadiay Barangay Dan-ar ditoy nga ili idi malem ti Enero 1.

Naammuan manipud iti report ti polis ditoy nga ili a bayat ti panagkurba ti Toyota Lite Ace a minaneho ni Roden Dykee y Jimenez, 45, ken residente iti Barangay Sapang, Galimuyod, Ilocos Sur, napukaw ti drayber ti kontrolna iti manibela ket nagekis ti lugan sa nabaliktad iti kannigid a pasetna a nakadunoran amin dagiti naglugan.

Naitaray iti Candon General Hospital dagiti pasahero ti lugan a pakairamanan da Decely Dykee y Morandante, 17; Estefanie Lopez y Cortez, 12; Precious Joy Galutan y Morgan; Joerge Gamueda y Cortez; Mary May Astrero y y Danilo; Calixto Cortez Jr y Villegas; Andrea Hiponia y Macenciong, 14; Dayton Dykee y Morandante, 15; ken Angelica Hiponia y Bacencio, agpapada amin a residente iti Barangay Sapang, Galimuyod, Ilocos Sur.

Kakaruan ti dunor ti drayber idinto a minor injuries laeng ti sinagrap dagiti pasahero ti van.#