10-wheeler truck, van nainbolbar iti aksidente

SANTA, Ilocos Sur – Ti kinagalis ti kalsada ti mapapati a nakaigapu iti aksidente a nakainbolbaran ti maysa a 10-wheeler truck ken maysa a van sadiay Barangay Banaoang ditoy nga ili idi agarup 5:35 iti malem ti Septiembre 21.

Sumalsalog ti 10-wheeler truck a minaneho ni Wilmer Delas Peñas, 22, residente iti Malagasang IE, Imus, Cavite idi napukaw ti drayber ti kontrolna iti manibela gapu iti kinagalis ti dalan ket nadungpar ti kutit ti 10-wheeler truck ti sungo ti Isuzu Elf closed van a minaneho ni Kevin Somera y Pinzon, 28, residente iti Barangay Vacunero, Sto. Domingo, Ilocos Sur.

Gapu iti impact, dinungpar ti 10-wheeler truck ti kongkreto nga alad ti balay ni Pedro Batin idinto a dinungpar met ti van ti SK Hall the nadakamat a barangay.

Nagsagrap da Wiliayson Rondon y Retreta, 20, ken Reisson Pastor y Pescador, 23, a naglugan iti van iti dunor ket naitarayda iti Ilocos Sur District Hospital, Narvacan, Ilocos Sur.#