Footer

100 parolees, pardoners, naipaayan medical, dental, optical services

CANDON CITY – Aganay a sangagasut a parolees ken pardoners agraman pamiliada ti impaayan ti Parole and Probation Office iti serbisio a medikal, dental ken optical ken libre nga agas kas paset ti panangselebrarna iti Parole and Probation Week a naangay iti Justice Hall ti Candon City itay nabiit.

Indauluan ni Frances Tomenden, hepe ti PPO a mangsaksakup iti maikadua a distrito ti Ilocos Sur, dagiti PPO volunteers iti panangidaulo ni Pastor Donald Omaoeng, bise presidente iti Region 1,  dodoktor, kameng ti BJMP, ken Citizens’ Involvement and Services ti pannakaisayangkat ti nasao a serbisio kadagiti parolees ken pardoners.

Timmabuno pay ni PPA Regional Director  Marlyn Mojo iti nasao nga okasion.

Kinuna ni Mojo nga ipapaay pay ti PPA ti livelihood projects, counselling ken dadduma pay nga aktibidad para kadagiti parolees ken pardoners.

Segun ken ni Tomenden, adda 62 a parolees ken pardoners iti maikadua a distrito.

Kinuna met ni Mojo nga agdagup iti 1,919 dagiti parolees iti Region 1. (Danny Antalan)