1,000 nabenepisiaran iti medical, surgical, dental mission

NARVACAN, Ilocos Sur – Nasurok a sangaribu dagiti umili a naipaayan ti libre a serbisio iti medical, dental ken surgical missions a naangay ditoy ken iti Candon City itay Enero 30-31.

Segun ken ni Dr. Diana Lim iti Rural Health Office ditoy,  nasurok a 1,000 a pasiente ti naikkan iti libre a check-up ken libre nga agas a pakairamanan dagiti ubbing a naikkan iti libre a bitamina.

Naangay ti nasao a mission babaen ti tulong ti University of the East Ramon Magsaysay Medical Center Alumni Association, grupo dagiti duktor manipud California ken dagiti lokal a duktor  ken iti panangisponsor da Congressman Eric Singson, Mayor Allen Singson ken Mayor Edgar Zaragoza.

Indauluan ni Dr. Edgar Morales Bañez ti mission a pakairamanan ti 20 a dodoktor, 6 a dentista ken 10 a nurses. Pakairamanan dagiti inyegda ditoy Filipinas dagiti agas ken medical equipments a naaramat iti operasion.

Naangay ti medical mission ditoy nga ili idi Enero 30, ken ti dental ken surgical mission iti Candon City idi Enero 30-31.

Kabayatanna, impakaammo ni Perla Gazmen, board secretary ti Candon City Hospital nga iti pakadagupan dagiti pasiente a nabenepisiaran iti nasao a mission iti siudad,  sumurok-kumurang a 500 ti naipaayan iti free medical check-up, 200 iti dental, ken surgical operasion kadagiti sumaganad:  goiter, 17; hemorrhoids, 5; hernia, 10; breast mass, 6; ken iti cyst,  sumurok-kumurang sangagasut.#