10,000 bunubon ti marunggay, katuday, naiwaras

CABUGAO, Ilocos Sur – Agdagup iti 10,000 dagiti bunubon ti marunggay ken katuday ti naiwaras kadagiti amin a barangay ditoy, daytoy ti inwaragawag ni Municipal Environment and Natural Resources Officer Edgar S. Balangatan, AT, itay nabiit.

Kinuna met ni Ester P. Aguimbag, AT ti gobierno munisipal ditoy a 3,000 a bunubon ti katuday ken 7,000 seedlings iti marunggay ti naiwaras kadagiti amin a 33 a barangay ditoy nga ili.

Naggapu dagiti bunubon iti Department of Agriculture- RFO 1 iti babaen ti High Value Commercial Development Program (HVCDP) ken iti pannakikammayet ni opisina ni Mayor Edgardo S. Cobangbang, Jr.

Naideposito dagiti bunubon iti municipal bamboo propagation nursery sadiay Barangay Backlig sakbay ti pannakaiwarasda kadagiti barangay ditoy nga ili.#