100,000 kaykayo naimula Piesta ti Kabambantayan

CANDON CITY – Agdagup iti 100,000 a kaykayo ti naimula sadiay Barangay Palacapac kas panangselebrar iti Piesta ti Kabambantayan idi Hunio 27.

Nangrugi ti pannakaselebrar ti Piesta ti Kabambantayan idi 2010 iti babaen ti administrasion ni Mayor Allen Singson.

Nagmula dagiti opisial ti gobierno, agad-adal, empleado, pribado a grupo ken kompania ken dagiti agindeg iti nadakamat a barangay iti nadumaduma ti klasena a kaykayo iti aglawlaw ti watershed a sakup ti Barangay San Andres ken Barangay Palacapac.

Indagadag ni Mayor Ericson Singson ti agtultuloy a panagtitinnulong dagiti agindeg iti siudad tapno matagiben ti aglawlaw ken malapdan ti panagbara ti lubong.#