103 polis, soldado, nagturpos iti Bayanihan Team Activity Training

SAN FERNANDO CITY – Sangagasut ket tallo a polis ken soldado ti nagturpos iti Bayanihan Team Activity Training iti seremonia a naangay iti Police Regional Office 1 grandstand ditoy itay Abril 8.

Kinuna ni PRO1 Regional Director Police Chief Superintendent Roman A. Felix, a 65 a miembro ti Regional Public Safety Battalion 1 (RPSB1) ken 38 a kameng ti 81st IB, 7th ID, Philippine Army dagiti nagturpos kalpasan a nakumpletoda ti panagsanayda a nangrugi idi March 1, 2015.

Ti joint training ket paset ti peace development initiatives ti PRO1 ken ti Philippine Army kas maibatay iti Internal Peace and Security Plan ti Armed Forces of the Philippines tapno magun-od ti kappia, seguridad ken kinatalingenngen iti komunidad ken iti pagilian.

Kinuna pay ni Felix a ti Bayanihan ket tuloy ti programa ti PRO1 a “panangabak iti gubat nga awan ti maiputok uray maysa a bala”.

Naangay ti panagsanay iti Barangay Bio, Tagudin, Ilocos Sur ket nagpaut iti tallo a lawas.