Footer

104 polis ti Region 1, naipatulod iti Sulu

CAMP BGEN OSCAR M FLORENDO – Nasurok a sangagasut a polis manipud iti police regional  office ditoy ti naipatulod iti Mindanao idi dandani agtapos ti bulan ti Marso.

Agdagup iti 104 ti bunggoy ti 1st Regional Public Safety Management Battalion (1RPSMB) ken dadduma a manuever units ti PRO1 ti pinalubosan da Police Chief Supt. Constante D. Azares, Jr, Region 1 police director, ken Police Senior Supt. Alejandro M. Valerio, Jr., Battalion Commander ti 1RPSMB nga agturong iti Sulu iti Mindanao idi Marso 25.

Naipatulod ti company sized a tropa a buklen ti 5 a police commissioned officers ken 99 police non-commissioned officers iti Sulu a mainayon iti Task Force “Band-It”, maysa a police operation unit a nakabase iti nasao a probinsia. Suktan ti grupo ti tropa manipud iti police regional offices ti 4A ken 8 a naideploy iti Sulu manipud pay idi Oktubre idi napan a tawen.

Sakbay a nagluas ti bunggoy, inyunay-unay ni Azares kadakuada ti kinapateg ti panagkararag iti Dios.

Kinuna ni Azares a kasapulan ti panagobserba dagiti miembro ti contingent iti disiplina idinto nga innayonna nga ag-reflect ti gapuananda iti sibubukel a PRO1.

Impanamnama ti heneral a maited kadagiti miembro ti contingent amin a kasapulanda a suporta.

Kinuna met ni Valerio a paset ti pannakaipatulod ti contingent iti direktiba ti Philippine National Headquarters ket agtalinaed ti tropa iti Sulu iti saan a nakurkurang ngem tallo a bulan, no saanda la ketdi a mapagawid a nasapsapa.

Sakbay ti pannakaipatulodda, nagsanay ti contingent iti physical conditioning activities ken combat scenario exercise tapno maisaganada iti kabarbaro nga assignmentda.#