1,098 polis iti rehion, nairekomenda a maipromot

SAN FERNANDO CITY – Inwaragawag ni Police Chief Supt. Leopoldo N. Bataoil, regional director ditoy, nga agdagup iti 1,098 dagiti police personnel manipud kadagiti uppat a probinsia iti rehion ti nairekomenda a maipromot ti ranggoda.

Kinuna ni Bataoil a nairekomenda dagiti polis kas pammigbig iti nagapuananda iti pannakaipakat kadagiti paglintegan, panagballigi kadagiti rupak ken panangkalbit iti biag dagiti tattao iti rehion.

Innayon ti regional director nga inrekomendana ti promosion dagiti polis kalpasan ti pannakapasada ti proseso ti panagsagat ken ebaluasion nga insayangkat ti Regional Promotion Board kas maibatay iti kualipikasion iti educasion, training, eligibility ken experience nga intuding ti National Police Commission.

Kinuna ni Bataoil a 736 a PO2  ti maipromot a PO3, 268 a PO3 ti maingato iti SPO1, 27 nga SPO1 ti mapan a SPO2, 33 SPO2 ti agbalin a SPO3 ken 34 nga SPO3 ti ngumato a SPO4.

Impalgak pay ni Bataoil a makibalubal ti regional office ditoy a kasayaatan a PRO idinto a finalists ti uppat a units iti rehion para iti best police units iti sapasap a pagilian.

Nairaman a pagpilian a maikkan iti pammadayaw ti Regional Mobile Group 1 nga idadauluan ni  Group Director PSSupt. Edgar Basbas  para best regional mobile group of the year, Pangasinan Police Provincial Office nga idauluan ni  Provincial Director PSSupt. Isagani Nerez para best police provincial office of the year,   ti Dagupan City Police Station nga ipanguluan ni  City Police Chief  Supt. Dionicio Borromeo para best city police station of the year ken ni NUP Michelle Nabua manipud iti NUP Section kas best civilian employee.

Kinuna ni Bataoil a no maiyalat ti regional office ti pammadayaw a best PRO, daytoy ti maikapat a pannakabigbigna manipud naipasdek ti nasao nga opisina idi 1990. 

Napadayawan ti PRO1 kas kasayaatan a  PRO idi 1997 idi adda iti babaen ni dati a regional director  ken agdama a  Pangasinan Governor Amado Espino Jr., idi 2000 iti babaen ni General Jose Ayap ken itay napan a tawen a ni Bataoil ti regional director.#