11 armado a lallaki, rinautda maysa a barangay, pinuoranda 2 motorsiklo dagiti soldado

STA. CRUZ, Ilocos Sur – Sangapulo ket maysa nga armado a tattao a mapapati a kameng ti lokal a grupo dagiti terorista ti rimmaut iti maysa a barangay ditoy nga ili sada pinuoran ti dua a motorsiklo a kukua dagiti soldado.

Inreport ni Bugbuga Barangay Captain, Daniel Andaya iti polis ditoy nga idi agarup alas 7:25 ti bigat ti Oktubre 6, sangapulo ket maysa a lallaki ti simrek iti barangayda, pinorsarda a linuktan ti barangay hall babaen ti panangputedda iti padlock, inruarda ti dua a single motor, maysa a Honda Wave ken maysa a Yamaha Vega, sada pinuoran dagitoy iti plasa ti barangay.

Segun iti barangay captain, kukua dagiti soldado a nainaganan Cpl. Jomar de Guzman ken  Cpl. Sherwin Villegas, kameng ti Philippine Army, ken miembro ti “B” Coy, 81st IB, 7th ID a nakabase iti Brgy. Padaoil, Sta Cruz, Ilocos Sur, dagiti motorsiklo.

Iti inisial a panagimbestiga dagiti nagtipon nga elemento ti 81st IB nga indauluan ni 1Lt. Joseph Calma, CO,  “B” Coy  ken PNP Sta. Cruz iti panangipangulo ni Police Inspector Alejandro Manzano Jr., naammuanda a nakita ti maysa nga agnagan Florencio Laranang a limmabas iti asideg ti balayna ti innem a di nabigbig a lallaki idinto a 5 ti nagna iti barangay road nga agturong iti barangay hall.

Kinuna ni Laranang a kalpasan ti kagudua ti oras, nakangeg laengen iti napigsa a kanalbuong manipud iti barangay plaza nga idi agangay ket naammuan a dagiti napuoran a motorsiklo ti bimtak.

Segun ken ni Laranang,  saanna nga intaltalek ti kanalbuong agsipud ta ammona nga adda dagiti soldado iti barangayda.

Saan a nailanad iti report no ayan dagiti soldado idi simrek dagiti lallaki.

Naammuan ketdi a mangisaysayangkat dagiti soldado a kameng ti 81st IB iti serbisio a bayanihan iti Barangay Bugbuga.

Suspetsa dagiti lumugar a kameng ti lokal communist terrorists dagiti nangpuor iti dua a motorsiklo.

Agtultuloy ti panagimbestiga dagiti polis no apay a pinuoran dagiti di nabigbig a lallaki dagiti motorsiklo.#