Footer

11 oversized a baboy a maipuslit a maibiahe iti Vigan City, nasalamaan dagiti polis

SAN ESTEBAN, Ilocos Sur – Iti sanguanan ti alegasion nga adda panagpasuksok iti quarantine area iti Tagudin, sangapulo ket maysa a baboy ti nasalamaan dagiti polis iti Barangay San Nicolas ditoy nga ili a maikarkarga iti lugan tapno maipuslitda iti siudad ti Vigan idi parbangon ti Agosto 17.

Iti report ni PInsp. Joel Molina Castillo, ACOP ditoy nga ili, bayat ti panagpatroliada idi agarup 12:10 ti parbangon ti nadakamat a petsa, nasalamaanda ti dua a lugan a nakaparking iti makindaya nga abaga ti national highway a sakup ti Barangay San Nicolas ditoy nga ili ket idi agusisada, naduktalanda a madama ti pannakaiyalis dagiti 11 nga oversized a baboy a karga ti Isuzu Elf a minaneho ni Joey Daplian y Wadawad, 14, baro, awanan iti driver’s license ken residente iti Barangay Man-atong, Suyo Ilocos Sur, iti sabali met nga Isuzu Elf a minaneho ni Caesar Sipian y Sacnit, 29, baro, awanan iti lisensia ken residente met laeng iti Barangay Man-atong.

Mapapati a naggapu dagiti baboy iti Pangasinan ket maikarkargada iti sabali a lugan tapno maibiaheda iti Vigan City, Ilocos Sur.

Idi awan ti naiparang da Daplian ken Sipian a permit iti pannakaibiahe dagiti baboy ken awan ti resibo manipud iti Opisina ti Animal Quarantine, naaresto dagiti dua sada naipan agraman dagiti baboy ken luganda iti municipal police station para iti dokumentasion. Naipaima dagitoy kalpasanna kada Mark Joseph L. Alcausin, Animal Quarantine Officer, PSI Eliseo C. Laiz, Asst. Quarantine Officer/team leader ken PO2 Robert Lopeaz, duty PNP personnel iti Barangay Bio, Tagudin.

Karaman nga inaresto dagiti polis dagiti helpers a nainaganan a da Jeffrey Yangod y Aliona, 35, baro; ken Robert Cawing y Bullong, 21, baro, agpada a residente iti Dinwende West,  Cervantes, Ilocos Sur.

Iti baet ti pammilin ni Gov. Luis “Chavit” Singson nga awan ti mapalubosan a maiserrek nga oversized a baboy iti probinsia, adda  dagiti natiliwan dagiti polis iti kallabes a maibiahe a baboy nga alegasion a naipuslit dagiti negosiante babaen ti mapapati a panagpasuksok iti personnel iti quarantine area.

Ngem segun iti inwayat ti opisina ti provincial veterinarian a panagimbestida, awan ti naduktalanda a mapaspasuksokan a personnel iti quarantine area.#