11 tattao, minalasda iti Piesta dagiti Sasanto

CAMP ELPIDIO QUIRINO, Bantay, Ilocos Sur – Nadara nga aldaw ti Piesta dagiti Sasanto para iti sangapulo a tattao gapu iti pannakainbolbardaĀ  kadagiti nagsasaruno nga aksidente iti lugan iti sumagmamano a lugar ditoy probinsia.

Iti report a dimmanon ditoy, napasamak idi Nobiembre 1Ā  dagiti aksidente iti Sta. Lucia, Sto. Domingo, ken iti Santa, Ilocos Sur a a nakatayan ti maysa ken nakadunoran ti sangapulo.

Maysa ti natay ken uppat ti nadundunor itiĀ  aksidente iti Sta. Lucia a napasamak idi agarup 7:30 ti sardam daytoy nga aldaw a pakairamanan dagiti drayber ti Yamaha Mio ken ti Honda TMX a traysikel, ken dagiti pasaherona.

Immuna a naitaray iti Sta. Lucia District Hospital sa naiyalis iti Candon City Hospital ni Henry Ricarze y Bustillo, 47, naasawaan, ken residente iti Barangay Catayagan, ngem pimmusay iti agsapa ti Nobiembre 2.

Naitaray met iti Sta. Lucia District Hospital ni Alden Encarnacion y Haboc, 19, baro, residente ti Barangay Damacuag, Sta. Lucia, Ilocos Sur ken dagiti pasaherona a da Alvin Isidro y Petinez, 5; Larry Jude Ragonjan y Haboc, 27, baro, ken Mike Victor Hagoot y Fabrigas, 19, baro, agpapada a kalugaran ni Encarnacion.

Segun iti report, agpada nga agpaamianan a direksion dagiti dua a lugan idi aksidente a nadungpar ti Yamaha Mio ti sarsarunuenna a Honda TMX a puon ti nakasugatan dagiti amin a naglugan.

Uppat met ti nadunor iti aksidente a napasamak iti kalsada nasional a sakup ti Barangay Magsaysay District, Santa, Ilocos Sur ket naitarayda amin iti Central Ilocos District Hospital iti Narvacan, Ilocos Sur.

Nainaganan dagiti biktima a da Roland Daria y Ayudan, 28, residente iti Barangay San Mariano, Bantay, Ilocos Sur, ken ti inluganna a ni Maribel Pineda, residente iti Barangay Palang, San Quentin, Abra; ni Pfc Kristoffer Guerzon y Quindasan, 23, baro, kameng ti 41st IB, 5ID Phil. Army ken ti insakayna a ni Jeffrey Bunagan y Quidasan.

Naammuan iti panagimbestiga dagiti polis a mapapati nga adda nangsapgid iti motorsiklo a Honda XRM a minaneho ni Guerzon a puon ti nakaipuruakanda idinto a kimmaut ti luganda iti bangir a linia ket sinapgidna ti sumungad nga XRM motorcycle a minaneho ni Daria a nakarurosan daytoy.

Mapapati a bimmangon ti nakasapgid iti motorsiklo ni Guerzon ket naglibas a pimmanaw.

Dua met dagiti nasugatan iti aksidente ti lugan iti national highway a sakup ti Barangay Puerta Real idi agarup 5:35 ti malem ti Nobiembre 1.

Nabigbig dagiti biktima a da Benigno Rios y Almasan, 35, naasawaan, taga-Barangay Bantaoay, San Vicente, Ilocos Sur ngem agdama nga agnaed iti Barangay Medina, Dingras, Ilocos Norte; Angelie Sanchez y Fuerto, 18, balasang, ken residente iti Barangay Sagneb, San Ildefonso, Ilocos Sur.

Kas maibatay iti inbestigasion, agpaamianan ti Honda TMX a minaneho ni Rios idi mapapati a kellaat a bimmallasiw iti national highway ti Motor Star a minaneho ni Sanchez a puon ti nakasapgidan kenkuana ti immuna a lugan.

Nagsagrap iti sugat iti muging, makannigid nga abaga ken makannigid a saka ni Sanchez idinto a nadunor ti makannigid nga abaga ken makannawan a saka ni Rios.

Naitaray iti Metro Vigan Cooperative Hospital iti Bantay, Ilocos Sur ni Sanchez idinto nga iti Magsingal District Hospital ni Rios.

Saan a naan-ano dagiti inlugan ni Sanchez a da John Sanchez y Fuerto, 16, high school student, ken residente iti Barangay Cabusligan, Bantay, Ilocos Sur; ken ti kasinsinda a ni Lezel Joy Alasaas y Fuerto, 6, ken residente iti Barangay An-annam, Bantay, Ilocos Sur.#