11 tattao nadundunor iti nagsina nga aksidente

SAN EMILIO, Ilocos Sur – Sangapulo a tattao a pakairamanan ti maysa a masikog a maestra ti nadundunor gapu iti pannakaidungpar ti naglugananda iti maysa a sitio ditoy nga ili idi malem ti Enero 8.

Naitaray iti Candon City Hospital tapno maagasan dagiti dunorda da Lolita Galusan y Baoas, 47, naasawaan; Dolor Fermin y Urdasan, 45, naasawaan; Marcy Pabor y Laoad, 52, naasawaan; Denecia Aguilar y Crisostomo, 50, naasawaan, agpapada nga agnaed iti Barangay Cabaroan, San Emilio; Rommel Demetrio y Patindo, 30, naasawaan; Ginerva Demetrio y Julio, 29, naasawaan, maestra, masikog; Elma Burcio y Adriano, 53, naasawaan; Maxima Saldo y Patricio, 37, naasawaan; Ofelia Matiasan y Unungin, 45, naasawaan ken Michael Eleno y Eronin, 21, naasawaan, konduktor, agpapada a residente iti Barangay Gayaman, Luba Abra.

Naammuan iti report manipud iti polis ditoy nga agsalsalog nga agpadaya ti Galva private passenger type jeep a kukua ni Quaquin Tallo ti Gayaman, Luba, Abra ken minaneho ni Jonathan Bajo y Anong, 29, baro, ket idi makadanon iti Sitio Singaben, Barangay Cabaroan, napukaw ti preno ti lugan isu nga indungpar ni Bajo iti maysa a turod a kadaratan.

Kabayatanna, nadundunor ti maysa a motorista ken ti inkalubbonna idi sinapgid ti maysa nga Isuzu Elf ti Euro motorcycle a luganda bayat ti panagdaliasatda iti national highway a sakup ti Barangay Suso, Sta. Maria, Ilocos Sur idi agarup alas 5:00 ti malem ti Enero 8.

Dagus a naitaray iti Reyes Clinic and Hospital tapno mataming dagiti dunorda da Cris Angel Cabaluna y Cabotaje, 22, naasawaan, ken ni Jayson Cabaluna y Cabotaje, 16, baro, agpada a residente iti Barangay San Jose, Narvacan.

Mapapati nga inobertekan ti Isuzu Elf a minaneho ni Rolando Ramos y Macayan, 45, naasawaan, residente iti Barangay Puro, San Agustin, San Fernando City, La Union ti motorsiklo a minaneho ni Cris Angel iti nagkurbaan ti Barangay Suso ngem nasapgidna ti motorsiklo a puon ti nakaikrasan daytoy a nakadundunoran dagiti dua.

Boluntario a simmuko ni Ramos kadagiti barangay officials ti Suso sa naipaima iti Sta. Maria police station.#