11 tattao, nariput iti sugalan

SINAIT, Ilocos Sur – Sangapulo ket maysa a tattao a pakairamanan ti maysa a babai ti inaresto dagiti polis iti insayangkatda nga operasion iti maysa a pagtaengan iti Barangay Macabiag ditoy nga ili idi parbangon ti Disiembre 5.

Inaresto dagiti polis da Alfredo Ipac, Sr. y Respicio, 58, naasawaan, mapapati a maintainer ti sugalan; Joey Savellano y Ramos, 48; Arnel Tadao y Ines, 32, baro; Jayson Palpallatoc y Jacob, 25, baro; Philip Cezar y Lachica, 20, baro; Ruben Peralta y Cabading, 30, baro; Leonardo Irrebaria y Tambawa, 22, baro, ken Jennifer Tagorda, agpapada amin a residente iti Barangay Macabiag; Nicolas Ibarra y Palpallatoc, 44; Edison Ibarra y Palpallatoc, 46; ken Nonie Carandang y Malabag, agpapada a residente iti Barangay Rang-ay; ken Edgar Ramos y Ilacad, 40, residente iti Barangay Ubbog kalpasan a nariputda nga agsusugal iti balay ni Ipac, Sr.

Nakakumpiska dagiti polis iti sugalan ti uppat a P20 bill a pusta, 2 a babassit a dado, 11 a plastic chips a kolor asul, ken 7 a plastic chips a kolor nalabaga, maysa a kalub ti banga ken bassit a kayo a pagitubongan iti dado.

Naipan dagiti natiliw iti police station para iti pannakapalutpotda.#