112 polis, agatender iti Motorcycle Riding Course

CAMP BGEN OSCAR M FLORENDO – Tapno mapapigsa pay ti kampaniana maikontra kadagiti kriminal a nakalugan iti motorsiklo, dua a klase ti Motorcycle Riding Course ti linuktan ti Police Regional Office 2 ditoy itay Hunio 17.

Kinuna ni Police Chief Superintendent Roman A. Felix, Regional Director ti PRO1, nga agdagup iti 112 dagiti police personnel manipud kadagiti Police Provincial Offices (PPOs) iti Ilocos Norte, Ilocos Sur, La Union ken Pangasinan dagiti napili nga agatendar iti Executive ken Regular Motorcycle Riding Classes.

Agdagup iti 32 Police Commissioned Officers (PCOs) a pakairaman dagiti provincial directors iti Ilocos Norte, Ilocos Sur ken Pangasinan ken dadduma pay a  senior ken junior police officers a naka-assigned iti PRO1 headquarters ti agatendar iti executive class a maangay iti walo nga aldaw tunggal Sabado laeng.

Agdagup met iti 80 dagiti Police Non-Commissioned Officers (PNCOs), kaadduanna a nadesignaran a  Motorized Anti-Street Crime Operatives (MASCOs) ti agatendar iti regular class a maangay iti 30 nga aldaw.

Mangrugi ti umisu a training inton Hunio 23.

Kinuna ni Felix a ti maisayangkat a training iti panagmaneho iti motorsiklo, malaksid iti panggepna a mangsanay kadagiti polis iti sientipiko a panangkontrol iti motorsiklo ken tapno mapasayaat ti depensibo a panagmaneho ken abilidad a mangmaniobra iti motorsiklo ket paset ti prioridad a tignay ti PRO1 tapno makontra ken malapdan iti umad-adu ti krimen nga isayangkat dagiti dakes nga elemento ken nakamotorsiklo a kriminal tapno maputed dagiti kriminal nga aktibidadda iti Region 1.

Kinuna met ni Police Senior Superintendent Fortunato G. Guerrero, Chief of the Regional Highway Patrol Unit 1 (RHPU1), nga iyadalda kadagiti partisipante ti kasayaatan a panagsanay tapno magun-odda dagiti requirements ti kurso.#