12 barangay nawarasan iti sag-P300,000 manipud RA 7171

Sinait, Ilocos Sur – Sangapulo ket dua a barangay ti immuna a nawarasan iti sag-P300,000 manipud iti bingay ti munisipio ditoy iti RA 7171 iti baet ti panagriri dagiti saan a naikkan a barangay.

Riri dagiti dadduma a barangay no apay a kaadduan dagiti di agmulmula iti tabako ti naikkan iti pondo manipud iti RA 7171.

Mapapati a dagiti naikkan iti nasao a pondo dagiti barangay a bimmutos iti kandidato ti agdama a mayor iti napalabas a panagpilida iti federated president ti Association of Barangay Captains ditoy nga ili.

Ngem segun iti opisina ni Mayor Marlon Ines, dagiti naikkan ket dagiti immuna a nagkiddaw iti pondo manipud iti bingay ti munisipio iti RA 7171.#