12 beterano, nasab-itan iti medalia iti 70th Anniversary of Battle of Bessang Pass

CERVANTES, Ilocos Sur – Sangapulo ket dua a beterano iti Maikadua a Gubat iti Sangalubongan a taga-Ilocos Sur ken La Union ti napadayawan bayat ti pannakarambak ti maika-70 nga anibersario ti Battle of Bessang Pass iti Heroes Shrine ditoy nga ili idi Hunio 14.

Karaman kadagiti immawat iti Medal of Valor da Samson del Rosario, Leonardo Garrino, David Pascua, Marcos Timidan, Emiliano Padac, Hilario Nisperos, Marcos Misanes, Jose Tadifa, Enrique Malag, Vicente Elefante, Eulogio Rocca, ken ti kakaisuna a babai a napadayawan a ni Trinidad Galutan.

Ti Medal of Valor ti kangatuan a militar a pammadayaw a maited kadagiti kameng ti Armed Forces of the Philippines ken dagiti recognisado a puersa ti gerilia.

Timmabuno iti selebrasion ni Vice Gov. Deogracias Victor Savellano a nangibagi ken ni Gov. Ryan Singson, ni Congressman Eric Singson ken ni retired Brig. Gen. Restituo Aguilar, hepe ti Veteran’s Historic Memorial Division, a nangisuno ken ni retired Lt. Gen. Ernesto Carolina, administrador ti Philippine Veterans Administration Office (PVAO).

Iti mensahe ni Carolina a binasa ni Aguilar, kinunana nga ad-adda koma a lagipen ti Rupak iti Bessang Pass ngem iti Pannakatinnag ti Bataan agsipud ta daytoy ti kadakkelan a balligi dagiti allied forces iti pannakirupakda kadagiti soldado a Hapon nga indauluan ni Gen. Tomoyuki Yamashita.

Ti Bessang Pass ti maibilang a kaudian a nakatiponan ti puersa ti Japanese imperial forces ni Yamashita agsipud ta napateg daytoy a lugar iti depensa ti heneral iti amianan, a pakairamanan ti Balete Pass, ken Villaverde Trail ket iti pannakarubbuotna babaen ti United States Armed Forces in the Philippines (USAFP-NL) idi Hunio 14, 1945, dita metten ti nangrugian ti pannakakubong ni Yamashita a nagtungpal iti isusukona idi Septiembre dayta met la a tawen.

Nagpaut ti Battle of Bessang Pass iti uppat a bulan.#