12-km a kalsada nasional iti Tagudin, masilawan

Tagudin, Ilocos Sur – Impakaammo ti mayor ditoy a nangrugin nga agsilaw dagiti baro nga streetlights iti national highway a sakup daytoy nga  ili.

Kinuna ni Mayor Roque “Jun” Versoza a makatulong iti turismo ti pannakalawag ti kalsada nasional ditoy saan laeng iti Tagudin no di pay  iti sibubukel a probinsia ti Ilocos Sur. No malpas ti sibubukel a proyekto, aganay a 200 a poste ti mangsilnag iti 12 kilometro ti national highway a sakup ti ili manipud iti Barangay Bio iti abagatan agingga iti Barangay Becques iti Beddeng ti Sta. Cruz.

“Maysa nga ambisioso a proyekto daytoy a napagnunummuan iti napalabas nga Executive Legislative Agenda Formulation. Dakkelto ti maaramidanna iti pannakaiyam-ammo ti Tagudin kas ‘ruangan ti Ilocandia’ ta dakami ditoy ti masungad nga ili manipud  iti La Union,” inlawlawag ti mayor.

Kinuna ni Verzosa nga agpateg iti P29,000 tunggal poste ket naggapu pay sadiay Portland U.S.A. ti disenioda idinto nga innayonna nga adu a Tagudinians iti ballasiw-taaw ti nangikari a  mangigasto ken  makaammo iti bayad ti sumagmamano a poste.

Kinuna ni Verzosa nga espesial nga streetlights dagiti naimuntar kadagiti poste agsipud ta automatiko ti panaggangatda iti 6:30 ti malem kasta met  ti panagiddepda iti 4:30 ti parbangon.

Kabayatanna, 410 a paris ti sagala a nagaruat iti kadaanan ken kabaruanan a kawes  ti nagparada iti puseg daytoy nga ili iti naangay a Rampa Tagudiniana a nangpangayed iti panagpiesta daytoy nga ili itay Mayo 1.

Addaan iti tema a “Nabaknang a Tawid a Kultura, Ibiag ken Ipannakkel”, daytoy ti maikapat a pannakarambak ti TIKANLU (tinubong, kankanen, lubi-lubi) Festival ditoy.

Kinuna ni  Versoza a kangrunaan nga intandudo ti Rampa Tagudiniana ti  panangipakitada  iti “idi ken ita” ti ilida a nakipartisiparan dagiti ubbing, agtutubo, ken nataengan a pakairamanan pay dagiti opisial ti ili ken barbarangay.

Kinuna ni Verzosa a napintas ti partisipasion dagiti umili iti tinawen a Rampa Tagudiniana ngem ita a tawen ti kadakkelan iti rehistrasion.

“Rumbeng nga ipannakkel ken tuladen dagitoy maipagtangsit a kultura ti ilimi,” innayon ni Versoza.

Kinuna ti mayor  a mapukpukawen ti panangapresiar dagiti ubbing ken agtutubo kadagiti kadaanan a badbado gapuna  nga intandudoda ti nasao a pabuya kas paset ti tinawen a panagpiesta ti ilida.

“Bareng babaen itoy nga addang ti LGU, saan a laksiden ken lipaten  ti sumaruno a henerasion dagitoy a kawkawes ket makita ken isuotdanto pay  dagitoy,” kinuna ti mayor. (Mancielito S. Tacadena/NBN Vigan)