12 natay iti panagdinnungpar ti dyip, 10-wheeler truck

SARRAT, Ilocos Norte – Sangapulo ket dua a tattao a pakairamanan ti drayber, konduktor ken dagiti estudiante ti natay idi nakidinnungpar ti dyip a naglugananda iti maysa a 10-wheeler a truck sadiay Barangay Pariir, ditoy nga ili idi agsapa ti Oktubre 2.

Segun iti pakauna nga inbestigasion nga insayangkat dagiti polis ditoy, agpa-Laoag City ti dyip a minaneho ni Ludwig dela Cruz, residente iti Barangay Agitap, Solsona, addaan plate number AVZ 924, idi nakidinnungpar iti 14-wheeler truck nga addaan iti plate no. TGW 104 iti national highway a sakup ti Barangay 18, San Isidro ditoy met laeng nga ili idi agarup 7:30 ti bigat ti nadakamat a petsa.

Iti report ni Police Senior Supt. Marlou C. Chan, provincial director ti Ilocos Norte, ken ni Chief Supt. Franklin Jesus B. Bucayu, Region I police director, innagananna ti drayber ti truck a ni Vencio A. Butac. Simmuko ni Butac kadagiti nagresponde a police kalpasan ti insidente ket adda iti kustodia ti police station ditoy.

Kanaig daytoy, imbilin ni Bucayu ti panangiwayat dagiti polis iti in-depth investigation tapno maammuan ti pudpudno a napasamak.

Impeksa met ni Gov. Imee Marcos ti pannakipagriknana kadagiti pamilia dagiti biktima a kaadduan kadakuada iti estudiante ken nangipaay iti tulong kadagiti natayan.

Iti pakpakauna a report manipud iti polis ditoy, dead on the spot ni Mikee Winnie Agbayani, residente iti Suyo, Dingras; Jessica DC Durupan, 13, ken residente iti Parang, San Marcos; Evelyn Canonizado, residente iti Barangay Suyo, Dingras; ken maysa a lalaki a saan pay a nabigbig.

Naideklara nga awanen ti biagna ni Ludwig dela Cruz, residente iti Barangay Agitap, Solsona, drayber ti dyip, idi maidanon iti Governor Roque Ablan, Sr., Memorial Hospital (GRASMH); ni Glister Romero, konduktor ti dyip, idi maidanon iti GRASMH; Jeremy B. Burgos, first year high school student iti Parang, San Marcos, Sarrat; ni Angelica Cruz, third year high school student ti Parang, Sarrat idi maidanon iti Dingras District Hospital; ken ken ni Rylee Agustin Canonizado, 5, residente iti Barangay Suyo bayat ti pannakatamingna iti GRASMH;

Pimmusay ni Jane Ashley S. Pumaras, 15, 4th year high school iti Santa Rosa National High School; ni Angelica Malilay, residente iti Parang, San Marcos, Sarrat bayat ti pannakaagasna iti Mariano Marcos Memorial Hospital iti Batac City; ken ken maysa nga agnagan iti  Steve Bueno.

Agdama a matamtaming iti GRASMH ni Joshua Bolibol, residente iti Parang, San Marcos, Sarrat.

Iti kaudian a report, natalgeden ti kasasaadna.#