12 paltog a naisuko iti PNP, maisubli kalpasan ti gun ban

SANTIAGO, Ilocos Sur –  Maisubli met laeng dagiti paltog a naisuko iti police station para iti safekeeping inton aggibus ti Comelec gun ban, segun iti hepe ti polis ditoy.

Agdagup iti sangapulo ket dua dagiti paltog a naited iti police station ditoy para safekeeping.

Kinuna ni Senior Inspector Pedro Barbado, hepe ti polis ditoy, aggibus ti gun ban inton Hunio 13 ket isublidanto dagiti paltog nga impakumit dagiti politiko ken sumagmamano a sibilian tapno aywananda bayat ti panagkampania tapno masigurado ti natalna ken nakappia nga eleksion.

Maipalagip a nabusalan ti murdong dagiti paltog babaen ti masking tape sa pinirmaan ti hepe ti polis, DILG officer ken ti Comelec officer tapno masigurado a saanda a maaramat bayat ti panawen ti panagkampania.#