Footer

120 kameng ti CVO, agsanay iti basic military training

SINAIT, Ilocos Sur – Nasurok a sangagasut a miembro ti Civilian Voluntary Organization (CVO) ti nangrugi nga agsanay iti basic military training iti Barangay Magsaysay ditoy itay nabiit babaen ti panagkikinnammayet ti 77th Infantry (Cadre) Batallion, 5ID ken 503rd IB.

Immatendar iti panglukat a seremonia iti nasao a panagsanay ni Sinait Mayor Marlon Ines, Bokal Ronnie Rapanut a nangibagi iti gobierno probinsial, PNP Provincial  Director Police Senior Supt. Virgilio Fabros, dagiti local chief executives ken hepe iti PNP stations iti sumagmamano nga ili ti Ilocos Norte ken ditoy.

Agdagup iti 120 dagiti trainees a naggapu iti Badoc, Pinili, ken Nueva Era, Ilocos Norte ken daytoy nga ili.

Kalpasan ti panagsanayda,  manamnama nga agbalin dagiti trainees a  miembro ti Citizen Armed Forces Geographical Unit (CAFGU) a  makitinnulong iti 503rd Infantry Brigade iti panangpatalinaed iti urnos, linak ken talna iti Ilokandia, nangnangruna iti kampania maikontra iti insurhensia.

Iti panagbitlana, impalagip  ni Col. Renato Rirao, Commanding Officer  ti 502rd IB, kadagiti trainees a saan a rumbeng a pagpasindayagda ti uniporme a naikawes kadakuada idinto nga inyunay-unayna ti kinapateg ti disiplina ken kinasinseroda a mangakem iti responsibilidadda  kas  kameng ti CAFGU.

Kinuna ni Rirao nga agtultuloy ti armada ken kapolisan a mangikampania kontra iti terorismo ket  in-inut a masolbar daytoy babaen ti tulong ti komunidad.

Impanamnama ni  Rapanut kas nangibagi ken Gov. Deogracias Victor  Savellano a sisasagana a tumulong iti provincial government iti panagballigi dagiti plano ti armada ken PNP para iti pagsayaatan ti probinsia ti Ilocos Sur ken Ilocos Norte.#