1,200 iskolar, immawat iti pamaskua a grant

CANDON CITY – Sumurok-kumurang a 1,200 nga scholars iti maikadua a distrito ti Ilocos Sur ti immawat iti scholarship grants bayat ti Christmas party a naangay iti Candon Beach Resort, Barangay Darapidap ditoy siudad itay nabiit.

Nailatangan iti pondo dagiti scholars, pakairamanan dagiti iskolar iti Commission on Higher Education ken National Commission on Indigenous People manipud iti initiatibo ni Cong. Eric Singson.

Presente pay iti nasao a pasken dagiti iskolar iti Culinary Arts nga agbasbasa ditoy siudad.

“Itultuloyyo ti panagbasayo ta dakayo ti sumarsaruno a namnama ti pagiliantayo,” daytoy ti bugas ti mensahe ni Congressman Singson kabayatan ti Christmas party.

Inkari ni Singson a nupay saanton nga isu ti diputado iti maikadua a distrito ti Ilocos Sur, agtuloy latta daytoy a programana ta nangilatangen iti pondona para kadagiti sumarsaruno a tawen.

Daytoy ti maudi a termino ni Cong. Singson kas mangibagi iti maikadua a distrito ti Ilocos Sur.

Ni Eric Singson, Jr. ti opisial a kandidato ti Lakas-Kampi-CMD a para diputado iti 2nd district kalpasan nga insanud ni dati a Cong. Grace Singson ti kandidaturana iti nasao a puesto.

Maipalagip a ni Cong. Singson ti maysa kadagiti kaaduan iti scholarship grantees iti sapasap a pagilian.

Kabayatanna, nasurok a sangagasut nga ub-ubbing iti umuna a distrito ti pinaragsak ni Cong. Ronald Singson iti daytoy a Paskua idi Disiembre 21.

Agdagup iti 115 nga ubbing a kinuyog dagiti dadakkelda ti napan nag-shopping iti maysa a pagtagilakuan iti siudad ti Vigan iti sapatos, lupot, ay-ayam ken dadduma pay a pamaskuada manipud ken ni Singson.

Kalpasanna, nagkalanglang dagiti ubbing iti McDonald’s, kortesia ti diputado.

Nangipaay pay ni Singson iti pamaskuana iti sabali pay a 150 ubbing idi Disiembre 27.#