Footer

125 scholars, immawat iti tseke

CANDON CITY – Inawat dagiti 125 nga scholars ti Commission on Higher Education Special Study/Grant Program for Congressional Districts (CSSGP-SD) ti tsekeda manipud ken ni Congressman elect Eric Owen Singson, Jr. itay lawasna.

“Ti edukasion ti kapintasan a legacy a maited kadakayo ti gobierno, mangidadaulo ken dagiti nagannak.,” kinuna ni Singson iti mensahena kadagiti iskolar.

Adda kadagupan a sumurok-kumurang a 2,000 a bilang dagiti iskolar iti maikadua a distrito. Malaksid ti CSSGP-CD, adda pay dagiti iskolar a pagad-adalen ti CHED ken National Commission on Indigenous People.

Kabayatanna, aganay 300 nga agtutubo a taga-Candon ti nageksamen para iti scholarship nga ipaay ti city government ditoy.

Ngem kinuna ni City Councilor Rosario Villalobos a 60 laeng ti alaen ti gobierno ti siudad nga iskolarna.

Agdagupton iti 220 ti bilang dagiti iskolar ti city government.

Tinawen a mangilatlatang ti city government iti P1.4 milion  para iti scholarship programna.

Kinuna ni Villalobos a dumawdawat iti dakdakkel a pondo tapno ad-adu ti matulongan a masirib a marigrigat nga estudiante ditoy siudad.#