13 asosasion, nawarasan saggaysada a traktora

CANDON CITY – Saggaysada a traktora ti inawat dagiti sangapulo ket tallo nga asosasion iti maikadua a distrito ti probinsia idi Hulio 24.

Mismo a ni Congressman Eric Singson ti nangiyawat kadagiti traktora kadagiti benepisario nga asosasion kas katulongan dagiti kamkameng iti panagtalonda tapno dakdakkel ti maapitda.

Kinuna ni Singson a naggapu dagiti kabarbaro a traktora kada Presidente Benigno Aquino ken Department of Agriculture Secretary Proceso Alcala.

Karaman kadagiti naikkan iti traktora ti Alilem Communal Irrigation Association, Sigay Farmers Association, Bao-angan Payas Farmers Association ti Cervantes, Annak ti Deplas Farmers Association ti Galimuyod, Poblacion East Farmers Association ti Nagbukel, Pias Farmers Association ti Salcedo, Solid East Agrarian Reform Community ti San Esteban, Sabuanan Farmers Association ti Santa Lucia, Poblacion Sur, Farmers Association ti Gregorio del Pilar, Federation of Farmers Association ti Narvacan, Burayok ti Pinsal Irrigators Association ti Santa Maria, Burgonians Tobacco Farmers Association ti Burgos ken Santa Tomato Growers Association.

Sakbay daytoy, addan dagiti asosasion nga immuna a nakaawat iti farm machinery manipud met laeng iti Departamento ti Agrikultura.#