13 inbestigador a polis iti I. Sur, naibaon nga agadal iti CIC

BANTAY, Ilocos Sur – Sumagmamano a police investigators a naikappeng kadagiti police municipal offices iti Ilocos Sur ti naibaon nga ag-training iti investigative work a nangrugi a naangay idi Disiembre 15 iti Police Regional Office iti San Fernando City .

Naibaon nga ag-training iti Criminal Investigation Course, 4th Batch 2011 dagiti police investigators a pakairaman da PO1 Johnson Habon ti Alilem police station; PO1 Sonny Acosta ti Bantay PS; SPO1 Eric Valdez ken PO1 Carl Marc Bumachi ti Candon City PS; PO1 Juan Jhay AR Maggay ken PO1 Manuel Froebel Tiri tiĀ  Cervantes PS; SPO1 Onofre Unciano ken PO2 Hilario Costales ti Magsingal PS;Ā  PO2 Jennifer Abad ti Santa PS; Blessy Joy Biazon ti Sta. Cruz PS;Ā  PO1 Miriam Gabe ti Sta. Lucia PS; ken PO1 Hadji Lacasandile ken PO1 Joanne Garcia ti Tagudin PS.

Nairekomenda dagitoy nga inbestigador kalpasan a natakuatan nga agkurang wenno awan ti trainingda iti panagimbestiga kadagiti krimen a kasapulan iti pagannonganda.

Sakbayna, naipalaon iti maysa a memorandum a naggapu iti Police Regional Office 1 iti San Fernando City a naiturong iti Provincial Police Office ti Ilocos Sur a kapaliiwan ti nangatngato nga opisina a sumagmamano kadagiti inbestigador ti saan pay a naipababaen iti maiyannatup nga investigation training ket kasapulan a mapanda agsanay iti CIC, 4th batch 2011.

Kas panagtungpal iti nasao a memo, imbilin ni OIC Provincial Director Police Senior Supt. Noel Baguitan Amoyen kadagiti amin a chief of police iti Ilocos Sur ti panangipatulodda kadagiti police investigators iti babaenda nga awanan pormal a training iti panagimbestiga tapno mairamanda kadagiti agadal iti CIC.

Naammuan ti Tawid News a sumagmamano kadagiti nairekomenda a mapan agadal iti CIC ti nagkiddaw iti pannakaitantan ti panagtrainingda ngem iti sabali pay a memo manipud iti PRO1, naibilin kadagiti COPs ti panangallukoyda kadagitoy a mangituloy iti panagadalda ken ti panangisubmiteda kadagiti kasapulan para iti nasao a training tapno malapdan ti maipakat nga administrative sanction maikontra kadakuada.

Naipalaon pay iti memo a maysa a panaglabsing ti kaawan ti maiyannatup a training dagiti natudingan a police investigators iti direktiba ti nangatngato nga opisina, kas naipalanad iti maikatlo a panggep ti action plan ti PNP chief a ā€œpannakaidur-as ken espesialisasion ti kabaelanā€ dagiti polis nga inbestigador.

Naibilin pay kadagiti COP a no saan nga agtungpal dagiti inrekomendada nga ag-training iti CIC, marelibo dagitoy iti investigation unit a nakaikap-penganda ket maipanda iti sabali a seksion.#