Footer

1.3-M, nakipagrambak iti Panagbenga Festival

BAGUIO CITY – Immadu dagiti turista a simmang-at iti daytoy a siudad iti pannakarambak ti Baguio Flower Festival wenno Panagbenga, segun iti regional director ti Department of Tourism-Cordillera Administrative Region (DOT-CAR).

Kinuna ni Regional Director Purificacion Molintas nga agdagup iti 1.3 milion dagiti nairekord a turista a simmang-at ditoy siudad iti pannakarambak ti Panagbenga ket manamnama a ngumato pay agingga iti pannakalpas ti selebrasion itay Marso 8.

Itay napan a tawen, dimmanon laeng iti maysa a milion dagiti turista a simmang-at para iti selebrasion ti Panagbenga.

Kinunana a nairekord ti yaadu dagiti nagbakasion iti siudad idi maangay ti streetdancing parade ken ti fluvial float parade a naangay idi Pebrero 28 ken Marso 1.#